ഒഴിഞ്ഞ കുടം

ഓര്‍മ്മകളുടെ കുന്നിക്കുരുമണികള്‍

2012-02-03T17:17:00.007+03:00

പുറത്തു ചാറ്റല്‍മഴ പെയ്തിറങ്ങുന്നു.. മിഴി പൂട്ടാനെനിക്ക് കഴിയുന്നില്ല നിമിഷങ്ങള്‍ക്ക് പോലും വര്‍ഷങ്ങളുടെ ദൂരം...വിരഹത്തെ പിന്നിലേക്ക്‌ തള്ളിവിട്ടു എന്നേയും നിന്നരികിലേക്ക് കൊണ്ടുപോവാനുള്ള അനുമതിപത്രവുമായി നീയെത്താറായെന്നു പറഞ്ഞപ്പോള്‍ പടിവാതില്‍ കടന്നു നീ വരുമ്പോള്‍ നിന്നരികിലേക്ക് ഓടിയെത്താന്‍ വെമ്പുകയായിരുന്നു എന്‍ മനസ്സ്.

ഞാന്‍ തനിച്ചായപ്പോള്‍ എന്റെ ദുഖങ്ങളില്‍ എനിക്ക് കൂട്ടായി നിന്റെ ഓര്‍മ്മകള്‍ മാത്രമായിരുന്നു. പറയാനൊരുപാടുണ്ടായിരുന്നെനിക്ക്. നീ പോയതുമുതല്‍ എന്നരികിലെത്തുന്ന നാളുകളെണ്ണി നിന്റെ വരവിന്റെ ദിനവും സ്വപ്നം കണ്ടിരിക്കുകയായിരുന്നു ഞാന്‍

നിമിഷങ്ങള്‍ നീങ്ങുന്നില്ലെന്നു തോന്നിയപ്പോള്‍ വെളുത്ത ജാലകവിരി നീക്കി ജാലകം തുറന്നു നീ വരുന്നതും കാത്തു ഞാന്‍ പുറത്തേക്കു നോക്കിയിരുന്നപ്പോള്‍ മഴയില്‍ നനഞ്ഞു നില്‍ക്കുന്ന മരങ്ങളും,ഇലത്തുമ്പില്‍ നിന്നും ഇറ്റിവീഴാന്‍ മടിക്കുന്ന ജലകണങ്ങളും,മഴമുത്തുകള്‍ കൈ കുമ്പിളിലാക്കി നില്‍ക്കുന്ന ചേമ്പിലയും കാണാമായിരുന്നു.

പ്രണയം ഉള്ളിലൊളിപ്പിച്ചു ഒരു പുഞ്ചിരിമാത്രമെനിക്ക് സമ്മാനിച്ചുകൊണ്ട് എന്നരികിലൂടെ നീ ഒരുപാടുതവണ കടന്നു പോയി... പിന്നെയൊരു പുതുമഴയില്‍ നനഞ്ഞോടിവന്നു നീയെന്റെ കുടക്കീഴില്‍ കയറിയതും അന്നാദ്യമായ്‌ ഇഷ്ട്ടമാണെന്നു എന്റെ കാതില്‍ മൊഴിഞ്ഞതും ഞാനെന്നുമോര്‍ക്കാറുണ്ട്. മധുവൊഴുകുന്ന ശബ്ധത്തില്‍ നീയെന്നെ ഇഷ്ട്ടമാണെന്നു പറഞ്ഞപ്പോഴും എന്റെ നോട്ടം നിന്റെ തേജസ്സാര്‍ന്ന കണ്ണുകളിലേക്കായിരുന്നു.എന്‍ കണ്പോളകള്‍ ചേര്‍ത്തടക്കാതെ ഒരുപാട് നേരം ആ മിഴിയിലേക്ക് തന്നെ നോക്കിയിരിക്കാന്‍ ഞാനാഗ്രഹിച്ചു..പക്ഷെ അപ്പോഴേക്കും എന്നോടുള്ള ഇഷ്ട്ടം മൊഴിഞ്ഞു നീ നടന്നകന്നിരുന്നു. അന്നു നീ മഴനനഞ്ഞ് നടന്നു കയറിയത് എന്റെ ഹൃദയത്തിലേക്കായിരുന്നു.!

പിന്നീടുള്ള ഉറക്കം വരാത്ത രാത്രികള്‍ക്ക് നിന്റെ മുഖമായിരുന്നു. ഉറങ്ങിയാല്‍ കാണുന്ന സ്വപ്നങ്ങളില്‍ നിറയെ നീ മാത്രമായിരുന്നു.എത്രയെത്ര സ്വപ്നങ്ങളാ ഞാന്‍ നിനക്കായ് നെയ്തുകൂട്ടിയത്. ആ രാത്രി തീരാതിരുന്നെങ്കിലെന്നു ഞാനാശിച്ചു പോവാറുണ്ടായിരുന്നു.

പിന്നേയൊരു മഴക്കാലത്തായിരുന്നുവല്ലോ എന്റെ കഴുത്തില്‍ നീ മഹര്‍മാലണിയിച്ചതും നമ്മളൊരുമിച്ചു ജീവിതം തുടങ്ങിയതും..! പരസ്പരം സ്നേഹിച്ചും കണ്ടും കൊതിതീരും മുമ്പേ എനിക്ക് കൂട്ടായിരുന്ന നിന്നെ പ്രവാസം തേടിയെത്തി.എന്നെ മാറോടടുക്കി മിഴികള്‍ ഈറനണിയിച്ചു നീയെന്നോട് യാത്ര ചോദിച്ചപ്പോഴും ഹൃദയം പൊട്ടി നിശബ്ദമായി കരഞ്ഞു നിന്നെ ഞാന്‍ യാത്രയാക്കി.

ഇന്നീ പ്രവാസ മരുഭൂമിയില്‍ നനുത്ത ചാറ്റല്‍മഴ പെയ്തപ്പോള്‍ നീയും ഞാനുമടങ്ങിയ നമ്മുടെ കൊച്ചുലോകമായ ഫ്ലാറ്റിന്റെ അകത്തളത്തിലിരുന്നു എന്റെ മടിത്തട്ടില്‍ നിന്റെ തലചായ്ച്ചു മുടിയിഴകളില്‍ എന്‍ വിരലുകളോടിച്ചു സ്വപ്നം മയങ്ങുന്ന നിന്റെ കണ്ണുകളിലേക്കു നോക്കിയിരുന്നപ്പോള്‍ മനസ്സ് അറിയാതെ ഓര്‍മ്മകളുടെ കുന്നിക്കുരുമണികള്‍ പെറുക്കി..!!

നിനക്കായ്....

2011-12-11T06:07:00.001+03:00

11/12/2011
ജിദ്ദ

എന്റെ പ്രിയ കൂട്ടുകാരീ..

നിന്റെ മൌനം എന്നെ വല്ലാതെ വേദനിപ്പിക്കുന്നു. നിന്നെയോര്‍ത്ത് എന്റെ മനസ്സ് തേങ്ങുകയാണ്. ഞാന്‍ നിന്നെ കുറിച്ച്ചോര്‍ക്കാത്ത ദിനങ്ങളില്ല. എന്നെ നീ മറന്നു പോയോ..? ഓരോ ദിവസവും മണിക്കൂറുകളോളം സംസാരിച്ചിരുന്ന നമ്മള്‍ ഒന്ന് നേരില്‍ കണ്ടിട്ടും മിണ്ടിയിട്ടും നാളെത്രയായി..എത്ര തിരക്കിലായിരുന്നാലും ഓടി വന്നു നീയെനിക്ക് വിളിക്കാറുണ്ടായിരുന്നില്ലേ, ഇടക്കെങ്കിലും തമ്മില്‍ കണ്ടില്ലെങ്കില്‍ എന്തൊശ്വസ്ഥതയായിരുന്നു നമുക്ക്.. ഇത്തിരി നാളായി നിനക്കെന്തു പറ്റി..?

നീ തിരക്കിലാണെന്നെനിക്കറിയാം നിന്റെ തിരക്കിനിടയില്‍ എന്നെ നീ ഓര്‍ക്കേണ്ടാ.. എനിക്ക് പരിഭവമില്ല. നിന്നെ ഞാന്‍ മനസ്സിലാക്കുന്നു.. പക്ഷെ ഒത്തിരി തവണ നീയെന്നെ കണ്ടിട്ടും ഒരു വാക്കുപോലും പറയാതെ എന്നില്‍ നിന്നകന്നു നില്‍ക്കുന്നു. നീ മിണ്ടാതെ പോവുമ്പോ എന്റെ ഹൃദയം എത്രമാത്രം വേദനിച്ചിട്ടുണ്ടെന്നറിയോ... ആരോടും പറയാതെ ആരുമറിയാതെ കരഞ്ഞിട്ടുണ്ട് ഒരുപാട് ഞാന്‍ അതിന്റെ പേരില്‍.. കാണുമ്പോള്‍ നിന്റെ ഒരു ചെറു പുഞ്ചിരി മാത്രം മതിയെനിക്ക് എങ്കില്‍ എനിക്കാശ്വസമായേനെ.. എനിക്ക് നിന്നോടുള്ള സ്നേഹം ഒരു കൂട്ടുകാരിയോട് തോന്നുന്നത് മാത്രമായിരുന്നില്ല. എനിക്കുണ്ടായിരുന്നെങ്കില്‍ എന്ന് ഞാനാഗ്രഹിച്ച എന്റെ സഹോദരിയോടെന്ന പോലെയായിരുന്നു..അതുകൊണ്ടാവണം നിന്റെ മൌനം എന്നെ ഇത്രയേറെ വേദനിപ്പിക്കുന്നത്.

ഈ ഫ്ളാറ്റിനകത്തെ നിറഞ്ഞ ഏകാന്തതയില്‍ സൌഹൃദം എനിക്ക് വലിയൊരാശ്വാസം തന്നെയാണ്. മരുഭൂമിയിലെ മഴത്തുള്ളികളായി കിട്ടിയ എന്റെ സുഹൃത്തുക്കളില്‍ ഞാനേറെ സ്നേഹിച്ചതും നിന്നെ തന്നെയായിരുന്നു. നിദ്രയില്‍ പോലും നീയെന്റെ കൂടെയുണ്ടാവാറുണ്ട്, നമ്മള്‍ ഒരുപാട് സംസാരിക്കാറുണ്ട്. എനിക്കറിയാം നീയുമെന്നെ സ്നേഹിച്ചിരുന്നെന്നു..എന്താണ് കൂട്ടുകാരീ എന്നില്‍ നിന്നകലാന്‍ കാരണം? എവിടെയാണ് എനിക്ക് തെറ്റ് പറ്റിയത്..? എന്നില്‍ നിന്നും വാക്ക് കൊണ്ടോ പ്രവര്‍ത്തികൊണ്ടോ എപ്പോഴെങ്കിലും നിന്നെ വേദനിപ്പിച്ചുവോ? അറിഞ്ഞു കൊണ്ട് ഞാനാരേയും വേദനിപ്പിക്കാന്‍ ശ്രമിച്ചിട്ടില്ല..എന്നില്‍ നിന്നും ഇഷ്ട്ടപ്പെടാത്തതായി എന്തെങ്കിലും തോന്നിയിരുന്നുവെങ്കില്‍ ഒരു കൂടെപ്പിറപ്പിനോടെന്ന പോലെ എന്നോട് പറയാമായിരുന്നില്ലേ ? ഞാന്‍ തിരുത്തുമായിരുന്നല്ലോ....!

കണ്ടിട്ടും നീ മിണ്ടാതെ പോകുമ്പോള്‍ എന്റെ കൂട്ട് നിനക്കിഷ്ട്ടമാവുന്നില്ല എന്ന തോന്നല്‍ കൊണ്ടാണ് ഞാന്‍ നിന്നെ വിളിക്കാന്‍ ഭയപ്പെടുന്നത്. നിന്റെ സുഖ വിവരങ്ങളറിയാനായി ഞാന്‍ നിനക്കൊരു മെയില്‍ അയച്ചു ഇത്തിരി ദിവസങ്ങള്‍ കഴിഞ്ഞിട്ടും മറുപടി വരാതായപ്പോ തിരക്കിലായതിനാല്‍ നീ കണ്ടില്ലെന്നു തോന്നിയപ്പോഴാ നിന്റെ മൊബൈലിലേക്ക് എസ് എം എസ് വിട്ടത് . നീ തിരിച്ചു വിളിക്കുമെന്ന് പ്രതീക്ഷിച്ചു.. വിളിച്ചില്ലെങ്കിലും നീയെനിക്ക് മറുപടി തന്നു. അതെന്നെ ഒരുപാട് സന്തോഷിപ്പിച്ചു. എന്റെ ഹൃദയ നൊമ്പരം ഇത്തിരി കുറഞ്ഞ പോലെ തോന്നി...

അറിയില്ല എനിക്കും നിനക്കുമിടയില്‍ എന്താണ് സംഭവിച്ചതെന്ന് . എന്നെങ്കിലും നീയിതു വായിക്കുകയാണെങ്കില്‍ ഒന്നേ എനിക്ക് നിന്നോട് പറയാനൊള്ളൂ ..ഞാന്‍ എന്നും നിന്റെ കൂടെ ഉണ്ടാവും,എന്റെ കൊച്ചു ഹൃദയം നിന്നെ സ്നേഹിച്ചു കൊണ്ടേയിരിക്കും വെറുക്കാനെനിക്ക് കഴിയില്ല. നീയെന്നെ ഒരിക്കലും വെറുക്കരുത്. അറിഞ്ഞോ അറിയാതെയോ ഞാന്‍ നിന്നെ വേദനിപ്പിച്ചിട്ടുണ്ടെങ്കില്‍ മാപ്പ്...........!!!

സ്നേഹത്തോടെ
സ്വന്തം സുഹൃത്ത്

"കദീസുവിന്റെ മൂക്കുസ്മാന്‍"...

2010-06-09T02:20:00.004+03:00

ട്ര്‍ണീം..ട്ര്‍ണീം..ഫോണ്‍ നില്‍ക്കാതെ ബെല്ലടിക്കാന്‍ തുടങ്ങി. അടുക്കളയില്‍ നിന്നും ഓടി വന്നു ഫോണ്‍ എടുത്തപ്പോഴേക്കും അത് കട്ടായി.
വീണ്ടും അടിക്കുന്നതും കാത്തു കദീസു ഫോണിന്റെ അടുത്ത് തന്നെ നിന്നു. മേശപ്പുറത്തിരിക്കുന്ന ഉസ്മാന്റെ ഫോട്ടോയിലേക്ക് നോക്കി.
ചിന്തകള്‍ കദീസുവിനെ വിട്ടു ഭൂതകാലത്തേക്ക് മടങ്ങിപ്പോയി..!

പണിയൊന്നുമില്ലാതെ തേരാ പാരാ നടക്കണ ഉസ്മാന് ഓരോ ദിവസവും നേരം പുലരുന്നത് കദീസുവിന്റെ മൊഞ്ച് ആസ്വദിക്കാന്‍ വേണ്ടി മാത്രമായിരുന്നു.
കദീസുവിനെ ഒരു നോക്ക് കാണാന്‍ നേരം വെളുത്താല്‍ മാറ്റി ഒരുങ്ങി സ്കൂളിനടുത്തെ ബാലന്റെ തയ്യല്‍ കടയിലെത്തും കദീസു വരുന്നതും കാത്ത്..
കദീസു സ്കൂളിലേക്ക് തിരിയും വരെ അവളുടെ കുണുങ്ങികൊണ്ടുള്ള നടപ്പും കണ്ടു ഉസ്മാന്‍ പരിസര ബോധമില്ലാതെ നോക്കി നില്‍ക്കും!

ഉസ്മാന്റെ ഹൃദയത്തില്‍ തന്നോടുള്ള സ്നേഹം കൂട് കൂട്ടിയത് കദീസുവിന് ഒരിക്കലും അറിയില്ലായിരുന്നു..
അവളോട തന്റെ അനുരാഗം പറയാനുള്ള അവസരം കിട്ടിയിട്ടുമില്ല. കാരണം അവളെ കാണുമ്പോഴെല്ലാം വാല് പോലെ അവളുടെ ബാപ്പസൈതാലി ഹാജി കൂടെ ഉണ്ടാകും.

ദിവസങ്ങള്‍ കഴിയും തോറും ഉസ്മാന് കദീസുവിനോടുള്ള സ്നേഹം അണപൊട്ടി ഒഴുകാന്‍ തുടങ്ങി. ഹൃദയത്തില്‍ നിന്നും സ്നേഹം തൊണ്ടക്കുഴിയില്‍ എത്തിയപ്പോള്‍ ഉസ്മാന് ശ്വാസം കിട്ടാതെയായി തനിക്കു കദീസുവിനോടുള്ള സ്നേഹം മറച്ചു വെക്കാതെ ഉമ്മയോട് പറയാന്‍ തീരുമാനിച്ചു..
അടുക്കളപ്പുറത്ത് പാത്രം കഴുകിക്കൊണ്ടിരികുന്ന ഉമ്മയുടെ അടുത്ത് ചെന്ന് സ്നേഹത്തോടെ ഉമ്മാന്റെ അരികില്‍ ഇരുന്നു പാത്രങ്ങള്‍ ഉമ്മാക്ക് എടുത്തു കൊടുത്ത്ഉമ്മാനെ സഹായിക്കാന്‍ തുടങ്ങി..
പതിവില്ലാത്ത സ്നേഹവും പെരുമാറ്റവും കണ്ടപ്പോള്‍ ഉമ്മ ജമീലാത്ത ഉസ്മാനോടു ചോദിച്ചു..
"ന്താ..ഉസ്മാനെ അനക്ക് പറ്റിയെ...തിന്ന പാത്രം കൂടി നീക്കി വെക്കാത്ത ഇജ്ജ് ന്റൊപ്പം പാത്രം മോറാന്‍ കൂടേണ്ട"..

ഉസ്മാന്‍ ഉമ്മാ..ഉമ്മാന്നു വിളിച്ചു കൊണ്ട് കുണുങ്ങി നില്‍ക്കുന്നത് കണ്ടപ്പോള്‍ ജമീലാത്താക്ക് ദേഷ്യം വന്നു.
"ഇജ്ജ് കാര്യം പറയ്‌ ഉസ്മാനെ...ഇച്ച് അടുപ്പത്ത് നൂറൂട്ടം പണിള്ളതാ".........

"ഉമ്മാ.....നിക്ക് പാറപ്പറമ്പിലെ കദീസൂനെ പെരുത്തിഷ്ട്ടാ....ങ്ങള് ബാപ്പനോട് പറഞ്ഞിട്ട് ഓളെ ച്ച്..കെട്ടിച്ചെരണം"

ഉസ്മാന്റെ വാക്കുകള്‍ കേട്ട ജമീലാത്താക്ക് അരിശം കയറി..കഴുകിക്കൊണ്ടിരുന്ന അലൂമിനിയം പാത്രം നിലത്തേക്കിട്ടു.
കട കട ശബ്ദത്തോടെ ഉരുണ്ടു വന്ന പാത്രം ഉസ്മാന്റെ കാലില്‍ തട്ടി നിന്നു.

"അനക്കെന്താ ഉസ്മാനെ...പിരാന്താ....?
പണിം കൂലീം ഇല്ലാതെ തെക്കോട്ടും ബടക്കൊട്ടും നടക്കണ അനക്ക് ആരെങ്കിലും പെണ്ണ് തരോ...?
ബാപ്പാന്റൊപ്പം ഒന്ന് പീടീല് പോയിരുന്നോ..ബാപ്പാക്കൊരു കൈസഹായം ആവൂലെന്നു പറയുമ്പം ഇജ് കേക്കൂല..
അല്ലെങ്കിലും പാറപ്പറമ്പില് ഉള്ളോര് കായിക്കാരെല്ലേ..ഓല്‍ക്ക് ഞമ്മളെ പറ്റോ?
ന്റെ മോളെ പത്താം തരം വരെ പഠിപ്പിക്കും ഇന്നട്ട് ഗള്‍ഫ്‌കാര്‍ക്കെ കേട്ടിക്കൂന്ന് ഓളെമ്മ എപ്പളും പറയിണത് ഞാന്‍ എത്രട്ടം കേട്ടതാ....

ജമീലാത്താന്റെ വാക്കുകള്‍ കലന്തന്‍ഹാജിയുടെ മരമില്ലിലെ മരം ഈരുന്ന വാളുപോലെ ഉസ്മാന്റെ ഹൃദയത്തിലൂടെ തലങ്ങും വിലങ്ങും പാഞ്ഞു കൊണ്ടിരുന്നു !
ഹൃദയ വേദന ഒരു വിധം കടിച്ചു പിടിക്കുമ്പോള്‍ അവന്റെ മനസ്സില്‍ ഗള്‍ഫില്‍ പോയി പാറപ്പറമ്പുകാരേക്കാള്‍ വലിയ കാശ് കാരനാവണം എന്ന മോഹമായിരുന്നു.
ഗള്‍ഫില്‍ പോയി പൈസക്കാരനായി വന്നാല്‍ കദീസൂനെ ആരെയും കൂസാതെ ഞെളിഞ്ഞു നിന്ന് ചോദിക്കാലോ എന്നായിരുന്നു മനസ്സില്‍...

ഉമ്മാടെ കുടുംബത്തീന്നു ഓഹരി കിട്ടിയ അഞ്ചു സെന്റ്‌ ഭൂമി വിറ്റ് ആ..കാശ് ആമിന ട്രാവല്‍സ് നടത്തുന്ന കുഞ്ഞാണിയുടെ കയ്യില്‍ വിസക്ക് വേണ്ടി കൊടുത്തു.
തികയാതെ വന്ന കാശ് ഉമ്മാന്റെ കാതിലെ ചിറ്റും അരഞ്ഞാണവും വിറ്റുണ്ടാക്കി..!
ഏറെ കാത്തിരിക്കേണ്ടി വന്നില്ല..ഉസ്മാനുള്ള വിസ വിമാനത്തിന്റെ ഫോട്ടോയുള്ള ആമിന ട്രാവല്‍സിന്റെ വെളുത്ത കവറില്‍ കുഞ്ഞാണി ഉസ്മാന്റെ കയ്യില്‍ കൊടുത്തു. ഉസ്മാന്‍ ആ കവറിലുള്ള വിമാനത്തിലേക്കൊന്നു നോക്കി..അറബിക്കുപ്പായവുമിട്ട് കദീസുവിന്റെ വീടിന്റെ ഉമ്മറത്ത്‌ പോയി കദീസുവിനെ ഇറക്കി കൊണ്ട് വരുന്നത് സ്വപ്നം കണ്ടു.!

ഗള്‍ഫിലേക്ക് പോവാനുള്ള ആഹ്ലാദത്തില്‍ മതി മറന്ന ഉസ്മാന്‍...കൂട്ടുകാരന്റെ ബൈക്ക് കടം വാങ്ങി ദൂര ഭാഗങ്ങളിലുള്ള ബന്ധു വീടുകളില്‍ യാത്ര പറയാന്‍ പോവാനോരുങ്ങി.
വീടിന്റെ മുറ്റത്തുനിന്നും ബൈക്ക് സ്റ്റാര്‍ട്ടാക്കി വേലിക്കരികിലെത്തിയപ്പോ ദേ..കെടക്കണ് ഉസ്മാനും ബൈക്കും താഴെ..!!
ശബ്ദം കേട്ട് ഉമ്മ ജമീലാത്തയും ബാപ്പ മൂസാക്കയും ഓടി ഉമ്മറത്തെത്തി നോക്കുമ്പോള്‍ ഉസ്മാന്‍ താഴെയും ബൈക്ക് മുകളിലും..
"എന്താടാ ഉസ്മാനെ...എന്താ ഒരൊച്ച... അനക്കെന്താ അതിന്റെ ചോട്ടില് പണി?
ബൈക്കിനടിയില്‍ കിടക്കുന്ന ഉസ്മാനെ നോക്കി ബാപ്പ ചോദിച്ചു
"ഇതുപ്പാ..കിടന്നു സ്റ്റാര്‍ട്ടാക്കുന്ന വണ്ടിയാ".. ബാപ്പാന്റെ ചോദ്യത്തിന് മുന്നിലും ഉസ്മാന്‍ വിട്ടു കൊടുത്തില്ല!
"ഇമ്മാതിരി ബണ്ടിമേലോന്നും ഇജ്ജ് പോണ്ട..! നടക്കാന്‍ കാലില്ലെ ഹംക്കേ അനക്ക്"...
ഉപ്പാന്റെ ബാക്കി നാടന്‍ തെറിയും കൂടെ കേള്‍ക്കാന്‍ നില്‍ക്കാതെ.. ഉസ്മാന്‍ ഒരുവിധം ബൈക്ക് താങ്ങിപ്പിടിച്ചുയര്‍ത്തി സ്റ്റാര്‍ട്ടാക്കി മുന്നിലേക്കെടുത്തു നേരെ പോയത് ബഷീറിന്റെ ബാര്‍ബര്‍ ഷോപ്പിലേക്കാണ്...
ബഷീറിനു വലതു കണ്ണിനെ കാഴ്ചയോള്ളൂ..ഇടത്തേ കണ്ണിനു പൂര്‍ണ്ണമായിട്ടും കാഴ്ചയില്ല!
ഉസ്മാന്റെ താടി വടിച്ചു മീശ വെട്ടുന്നതിനിടയിലാണ് മൂക്കിലെ പുറത്തേക്കു വന്ന രോമം ബഷീറിന്റെ വലത്തേ കണ്ണില്‍ പെട്ടത്.. കറങ്ങുന്ന കസേര പിടിച്ചു തിരിച്ചിട്ടു ഉസ്മാന്റെ മൂക്കിനു നേരെ ബഷീര്‍ കത്രിക അടുപ്പിച്ചു.
"എന്റുമ്മാ"..... ഒരലര്‍ച്ച കേട്ട് ബാര്‍ബര്‍ ഷോപ്പില്‍ സിനിമാ വാരിക വായിക്കാന്‍ വന്നിരുന്നിരുന്ന അങ്ങാടിപ്പിള്ളേര് നോക്കിയപ്പോള്‍ ഉസ്മാന്റെ മൂക്കിന്റെ രണ്ടു ദ്വാരം വേര്‍തിരിക്കുന്ന മദ്യ ഭാഗമാണ് കണ്ണ് കാണാത്ത ബഷീര്‍ കട്ട് ചെയ്തത്!!
അങ്ങിനെ അന്ന് മുതല്‍ തല തെറിച്ച അങ്ങാടിപ്പിള്ളേര് ഉസ്മാനെ മൂക്കുസ്മാന്‍ എന്ന് വിളിക്കാന്‍ തുടങ്ങി. അത് പിന്നെപ്പിന്നെ..നാട്ടില്‍ പരക്കുകയും ചെയ്തു.

മൂക്കിന്റെ മുറിവെല്ലാം ഉണങ്ങി ഒരു ബന്ധു വീട്ടില്‍ യാത്ര പറഞ്ഞു വരുമ്പോള്‍ വഴിയില്‍ കണ്ട പള്ളിയില്‍ കയറി അസര്‍ നിസ്ക്കരിക്കാന്‍ തീരുമാനിച്ചു
ഗള്‍ഫില്‍ ചെന്നാല്‍ നിസ്ക്കാരം ഒഴിവാക്കാന്‍ പറ്റില്ല എന്ന് കാരണവന്മാര്‍ പറയുന്നത് കേട്ടപ്പോള്‍ ഒരു പ്രക്ടീസാവാന്‍ വേണ്ടി അത് വരെ നിസ്ക്കാരമില്ലാതിരുന്ന ഉസ്മാന്‍.. നിസ്ക്കാരം തുടങ്ങിയതാണ്‌!
വുളു എടുത്തു പള്ളിക്കകത്ത്‌ കയറിയ ഉസ്മാന് ആകെ കണ്‍ഫ്യൂഷനായി..
നിസ്ക്കാരപ്പള്ളി ആയതു കാരണം ഖിബല (നിസ്ക്കരിക്കാന്‍ തിരിഞ്ഞു നില്‍ക്കേണ്ട വശം) അടയാളം ഒന്നുമുണ്ടായിരുന്നില്ല.
ഉസ്മാന്‍ നോക്കിയപ്പോള്‍ ആരെയും കണ്ടില്ലതാനും... രണ്ടും കല്പിച്ചു ഏതോ ഒരു ഭാഗത്തേക്ക് തിരിഞ്ഞു നിസ്ക്കാരം തുടങ്ങി.
കുറച്ചു കഴിഞ്ഞപ്പോഴാണ് ബാക്കില്‍ നിന്നും കുശു കുശു ശബ്ദം കേട്ടത്........
ഉസ്മാന്‍ പാടുപെട്ടു ബാക്കിലേക്ക് ഇടക്കണ്ണിട്ടു നോക്കിയപ്പോള്‍ തന്നെ പിന്തുടര്‍ന്ന് ഒരുപാട് പേര്‍ നിസ്ക്കരിക്കുന്നു
പിന്നീട് കയറി വന്ന ആ നാട്ടുകാരനായ ഒരാള്‍ പറഞ്ഞു ഇമാം(നിസ്ക്കാരത്തിന് നേതൃത്വം കൊടുക്കുന്നയാള്‍) തിരിഞ്ഞു നില്‍ക്കുന്ന ഭാഗം ശരിയെല്ലെന്ന്!
ഇത് കേട്ട ഉസ്മാന്‍ ഒരൊറ്റ ഡയലോഗ്!!
"എബൌട്ടെന്‍"
ഇത് കേട്ടതും തന്നെ പിന്തുടരുന്ന നിസ്ക്കാരക്കാര്‍ എല്ലാം പിന്നിലേക്ക്‌തിരിഞ്ഞു
ഇമാം ആയി നിന്ന ഉസ്മാന്‍ നോക്കുമ്പോള്‍ തന്നെ പിന്‍തുടര്ന്നവരെല്ലാം മുന്നിലും ഇമാം ആയ താന്‍ ബാക്കിലും!
ഇനിയിപ്പോള്‍ തന്റെ ആവശ്യമില്ലല്ലോ...! ഉസ്മാന്‍ അവിടെ നിന്നും തടിയൂരി..

അങ്ങിനെ കാത്തിരുന്ന ആ ദിവസം വന്നെത്തി.....മൂക്ക്ഉസ്മാന്‍ ഗള്‍ഫിലേക്ക് പറന്നു....
എല്ലാവരെയും പോലെ തന്നെ..ഏറെ പ്രതീക്ഷകളുമായാണ് മൂക്കുസ്മാനും പ്രവാസ ലോകത്തേക്ക് കാലെടുത്തു വെച്ചത്.
വകയിലെ ഒരളിയന്റെ റൂമിലേക്കായിരുന്നു ഉസ്മാന്‍ പോയത്.. റൂമിലെത്തുവോളം ഒരു ഫൈവ് സ്റ്റാര്‍ സെറ്റപ്പായിരുന്നു ഉസ്മാന്റെ മനം നിറയെ..
പക്ഷെ..അവിടെ എത്തിയപ്പോള്‍ കണ്ട കാഴ്ച ഉസ്മാന്‍ പ്രതീക്ഷിച്ചതായിരുന്നില്ല..!പത്തിരുപതു പേര്‍ ഒരേ മുറിയില്‍ ഒന്നിച്ചുറങ്ങുന്നു!
പല ട്യൂണിലുള്ള കൂര്‍ക്കം വലികളും കേള്‍ക്കാമായിരുന്നു..അവരുടെ കൂടെ ഒരു വിധം ഉസ്മാനും ആ രാത്രി തള്ളി നീക്കി..
രാവിലെ എണീറ്റപ്പോള്‍ ഉസ്മാന്‍ അളിയനോടായി പറഞ്ഞു..
"അളിയാ ഇന്നലെ രാത്രി ഞാനൊരു പോള കണ്ണടച്ചിട്ടില്ല.. ഒന്ന് തിരിഞ്ഞു കിടക്കാന്‍ ഞാന്‍ പെട്ട പാടെ..!പുറത്തു പോയി തിരിഞ്ഞു വന്നാണ് ഞാനൊന്ന് തിരിഞ്ഞു കിടന്നത്"!

ദിവസങ്ങള്‍ കടന്നു പോയി.....ഒരു ദിവസം അളിയന്‍ വന്നത് ഉസ്മാനുള്ള ജോലിയുമായാണ്‌..
പുതിയ ജോലി കിട്ടിയതറിഞ്ഞു ഒരുങ്ങിയിറങ്ങിയ ഉസ്മാനെ കണ്ട അളിയന്‍ പറഞ്ഞു.." രണ്ടു ദിവസം ചെറിയ ബുദ്ധിമുട്ടുണ്ടാകും പിന്നെയത് പയ്യെ.. ശരിയായിക്കൊള്ളും!
"നാട്ടിലെ ബുദ്ധിമുട്ട് കാരണമാണ് ഇങ്ങോട്ട് പോന്നത്..ഇവിടെയും ബുദ്ധിമുട്ടോ..?അളിയന്റെ സംസാരത്തില്‍ നീരസം തോന്നിയ ഉസ്മാന്‍ ചോദിച്ചു.
"എന്നാല്‍ പിന്നെ ആ.. രണ്ടു ദിവസത്തെ ബുദ്ധിമുട്ട് കഴിഞ്ഞു പോയാല്‍ പോരെ അളിയാ"...ഉസ്മാന്‍ കളിയാക്കിക്കൊണ്ട് മറുപടി കൊടുത്തു!

ജോലി പിടിച്ചില്ലെങ്കിലും ജോലി സ്ഥലത്തു താമസിക്കുന്ന റൂം ഉസ്മാന് നന്നായി പിടിച്ചു...അളിയന്റെ റൂമിലെ പോലെ തിരിഞ്ഞു കിടക്കാന്‍ പുറത്തു പോയി വരേണ്ട ആവശ്യമില്ല...അത് തന്നെ മഹാ ഭാഗ്യം!!
കൂടെ താമസിക്കുന്നവരെല്ലാം സുഹൃത്തുക്കളായി.. കയ്യില്‍ കാശ് കിട്ടിത്തുടങ്ങി... വീട്ടിലെ പ്രാരാബ്ധങ്ങളും കുറഞ്ഞു വന്നു..
ഓലമേഞ്ഞ പുര പാറപ്പറമ്പുകാരേക്കാള്‍ വലിയ ടെറസായി മാറി..ഇതിനിടയില്‍ കദീസുവിനെ ഉസ്മാന്‍ മറന്നു തുടങ്ങിയിരുന്നു!
മൂക്കുസ്മാന്‍ ശരിക്കും ഗള്‍ഫുകാരനായി മാറി. എന്നാലും തനിക്കു കിട്ടിയ പേര് മാത്രം ആരും മാറ്റി വിളിച്ചില്ല.

വര്‍ഷങ്ങള്‍ രണ്ടു കൊഴിഞ്ഞു...........മൂക്കുസ്മാന്‍ ലീവിന് നാട്ടിലേക്ക് തിരിച്ചു.
വീട്ടിലെത്തി ഒന്നുറങ്ങാന്‍ കിടന്നപ്പോഴാണ്‌ ഉമ്മ ജമീലാത്ത വാതിലിനു മുട്ടിയത്. ഉറക്കത്തില്‍ നിന്നെഴുന്നേറ്റു കണ്ണ് തിരുമ്മി മുറിയില്‍ നിന്ന് പുറത്തേക്കു വന്നപ്പോള്‍ മുന്നില്‍ ബ്രോക്കെര്‍ കുഞ്ഞിപ്പാത്തു!
മുഖം കഴുകി വന്നപ്പോഴേക്കും ജമീലാത്ത മൂന്നു ഫോട്ടോകള്‍ ഉസ്മാന്റെ മുന്നിലേക്ക്‌ നീട്ടി.. മനസ്സിലാ മനസ്സോടെ പ്രാകി കൊണ്ട് ഉസ്മാന്‍ ഫോട്ടോ വാങ്ങി നോക്കി.. രണ്ടാമത് നോക്കിയ ഫോട്ടോ കണ്ടപ്പോ..ഉസ്മാന്‍ ഒരു നിമിഷം പതറി!
"താന്‍ സ്നേഹിച്ച ഒരുകാലത്ത് തന്റെ സ്വപ്നമായിരുന്ന കദീസു!!

പിറ്റേന്ന് തന്നെ ഉസ്മാന്‍ കദീസുവിനെ പെണ്ണ് കാണാനുള്ള ഒരുക്കത്തിലായിരുന്നു..അപ്പോഴാ കൂട്ടുകാരെല്ലാം പറഞ്ഞത് ആദ്യമായി പെണ്ണ് കാണാന്‍ പോവുമ്പോള്‍ വലിയ ബേജാറാ..! പെണ്ണിനെ കാണുമ്പോള്‍ വിറക്കും ഒന്നും ചോദിക്കാന്‍ കിട്ടില്ലാ..കദീസൂനെ നിനക്കറിയാമെങ്കിലും അവള്‍ക് നിന്നെ കുറിച്ച് അറിയില്ലല്ലോ..
ഉസ്മാന്‍ ഏതായാലും പോവുന്നതിനു മുന്പ് അഡ്വാന്‍സായി കുറച്ചു ചോദ്യങ്ങള്‍ പഠിച്ചു വെക്കാന്‍ തീരുമാനിച്ചു..
ആദ്യമായി പേര്! രണ്ടാമത് എത്രയിലാ പഠിക്കണേ..
പിന്നെ നമ്മുടെ കദീസുവല്ലേ..നിനക്ക് എന്നെ ഇഷ്ട്ടായോ..എനിക്ക് നിന്നെ ഇഷ്ട്ടായി..ഇത്രയും ഉസ്മാന്‍ മനപ്പാടമാക്കി!

പാറപ്പറമ്പില്‍ സൈതാലി ഹാജിയുടെ വീട്ടിലെ കോലായയില്‍ മൂക്കുസ്മാന്‍ ഞെളിഞ്ഞിരുന്നു.
ചായയും പലഹാരങ്ങളും എത്തി..ചായ കുടിച്ചപ്പോള്‍ സൈതാലി ഹാജി ചോദിച്ചു..
"പെണ്ണിനെ കാണേണ്ടേ.. ?
ഉസ്മാന് ആദ്യം നാണമായി പിന്നെ നാണം മാറി ബേജാറായി..
ഉസ്മാന്റെ മുന്നില്‍ തന്റെ ഒരു കാലത്തെ സ്വപ്നമായിരുന്ന കദീസു നില്‍ക്കുന്നു!
വിശ്വസിക്കാന്‍ കഴിയുന്നില്ല.. ഇത് സ്വപ്നമോ,യഥാര്‍ത്ഥമോ? ഉസ്മാന്‍ തന്റെ കൈത്തണ്ടയില്‍ ഒന്ന് പിച്ചി നോക്കി..വേദന തോന്നിയപ്പോള്‍ മനസ്സിലായി ഇത് സ്വപ്നമല്ല. കദീസു പഴയതിനേക്കാള്‍ സുന്ദരിയായിരിക്കുന്നു.
ഉസ്മാന്‍ കദീസുവിനെ ഒന്ന് നോക്കി വിളറിയ പുഞ്ചിരി സമാനിച്ചു കൊണ്ട് ആദ്യ ചോദ്യം ചോദിച്ചു
"എത്രയിലാ പേര്"..
പഠിച്ചു വെച്ച ചോദ്യങ്ങള്‍ ആദ്യത്തെതും രണ്ടാമത്തെതും മിക്സഡ്‌ ആയി ചോദിച്ചപ്പോള്‍..
പക്ഷെ.. കദീസു പതറിയില്ല.. അവള്‍ ഉടന്‍ ഉത്തരം കൊടുത്തു.
"പത്തില്‍ കദീസു"
ഉസ്മാന്‍ വീണ്ടും മൂന്നാമത്തെയും നാലാമത്തെയും ചോദ്യം കുഴച്ചു മറച്ചു ഒരുമിച്ചു ചോദിച്ചു.
"എനിക്ക് എന്നെ ഇഷ്ട്ടായി..നിനക്ക് നിന്നെ ഇഷ്ട്ടായോ"??
ഈ ചോദ്യത്തിന് മുന്‍പില്‍ കദീസു ഒരു നിമിഷം ആലോചിച്ചുനിന്നു എന്നിട്ട് മറുപടി കൊടുത്തു..
"അത് വലിയ കഷ്ട്ടായി"......
ഇന്റെര്‍വ്യൂ കഴിഞ്ഞപ്പോഴേക്കും കദീസു ഉസ്മാന് ചേര്‍ന്ന പെണ്ണ് തന്നെ എന്ന തീരുമാനെത്തില്‍ എത്തിക്കഴിഞ്ഞിരുന്നു അവന്‍.
വളരെ ആര്‍ഭാടപൂര്‍വം അവരുടെ വിവാഹം കഴിഞ്ഞു. കുറഞ്ഞ മാസങ്ങള്‍ ഒരുമിച്ചു ജീവിച്ചപ്പോഴേക്കും മൂക്കുസ്മാന്റെ ലീവ് കഴിയാറായി.
മൂക്കുസ്മാന്‍ ഗള്‍ഫിലേക്ക് തിരിച്ചു. കദീസു ദിവസങ്ങളും എണ്ണി നാട്ടില്‍ കാത്തിരിപ്പായി...

ട്ര്‍ണീം..ട്ര്‍ണീം..ഫോണിന്റെ ശബ്ദം കദീസുവിനെ ചിന്തയില്‍ നിന്നുണര്‍ത്തി മറു തലക്കല്‍ ഉസ്മാന്‍ തന്നെ..
എന്നെത്തെയും പോലെത്തന്നെ ഇന്റര്‍നെറ്റ്‌ ഫോണില്‍ നിന്നുള്ള ക്ലിയറില്ലാത്ത കോള്‍..!

നിന്നേയും കാത്ത്..

2010-05-19T02:40:00.002+03:00

കാല ചക്രത്തിന്‍ കറക്കത്താല്‍

മാറി മറയുന്നു വേനലും വര്‍ഷവും.

ഏകാന്ത പഥികയായി ഞാനെന്നുമീ

ജീവിത യാത്രയില്‍..!

മോഹങ്ങള്‍ ചിതലരിക്കും മുമ്പേ..

നീയെത്തുമോ എന്നരികിലായ്.

ഓര്‍മ്മകള്‍ ആര്‍ദ്രമാക്കുന്നീ മിഴികളെ..

സ്നേഹ ലാളനം നിനക്കായ്-

ഒരുക്കി വെച്ചു ഞാന്‍..!

തുടിക്കുമെന്‍ നെഞ്ചകം നിന്‍ വരവിനായ്

താരാട്ട് പാടി മാറില്‍ ചേര്‍ത്തുറക്കാനായ്

മുടിയിഴകളില്‍ തഴുകി തലോടാനായ്

കാത്തിരിപ്പൂ നിനക്കായ് ഞാന്‍.!

നീ വരുമെന്ന പ്രതീക്ഷയുമായ്..

എന്നില്‍ ജീവവായു നിറച്ചീടുവാന്‍

എന്‍ വേദനകള്‍ ആരോടും ഉര ചെയ്യാതെ..

ഹൃദയത്തില്‍ ഒതുക്കി ഞാന്‍

എന്നും ഒരു തേങ്ങലായി..!!

നിരപരാധി

2010-04-20T21:09:00.000+03:00

നീണ്ടമൂക്കും വിശാലമായ നെറ്റിയുമുള്ള മീരടീച്ചര്‍ ക്ലാസെടുക്കാന്‍ വന്നാല്‍ ക്ലാസുമുറികളില്‍ നിശബ്ദത തളം കെട്ടി നില്‍ക്കും കാരണം ടിച്ചറെ എല്ലാ കുട്ടികള്‍ക്കും ഭയമാണ് പുരുഷന്മാരുടെ ശബ്ദത്തെ വെല്ലുന്ന ടീച്ചറുടെ ശബ്ദം മാത്രമേ ക്ലാസ് മുറികളില്‍ കേള്‍ക്കുകയുള്ളൂ.. !! പതിവു പോലെ ഒരു ദിവസം രാമായണവുമായി ബന്ധപ്പെട്ട ഒരു പാഠം ടീച്ചര്‍ ക്ലാസെടുത്തുകൊണ്ടിരിക്കെ. പിറകില്‍ നിന്നും രണ്ടാമത്തെ ബെഞ്ചില്‍ അഞ്ചുകുട്ടികളില്‍ ‍ നടുവില്‍ ഇരുന്നിരുന്ന സുബൈര്‍ ഡസ്ക്കില്‍ തലവെച്ചു ഉറങ്ങുന്നത് ടീച്ചറുടെ ശ്രദ്ധയില്‍ പെട്ടത്.!!
ടീച്ചര്‍ക്ക് ദേഷ്യം വന്നു കയ്യില്‍ ഉണ്ടായിരുന്ന ചോക്ക് സുബൈറിനു നേരെ എറിഞ്ഞു.!! ഏറ് തലയില്‍ കൊണ്ട സുബൈര്‍ ചാടി എഴുന്നേറ്റു. ചുറ്റുപാടും നോക്കി. വായില്‍ നിന്നും ഒലിച്ചിറങ്ങിയിരുന്ന തേന്‍ ഇടതുകൈ കൊണ്ട് തുടച്ചു.!

ക്ലാസില്‍ ഇരുന്നുറങ്ങുന്നോ.. എന്നും ചോദിച്ച് ടീച്ചര്‍ അടുത്ത് വന്നു.അപ്പോഴും സുബൈറിനു താന്‍ എവിടയാ എന്നുള്ള ബോധം വന്നിരുന്നില്ല..!!

“രാമായണം എഴുതിയത് ആരാ…?

ടീച്ചറുടെ ഓര്‍ക്കാപ്പുറത്തുള്ള ചോദ്യം സുബൈറിന്‍റെ നേരെ..സുബൈര്‍ അടുത്തിരിക്കുന്ന കുട്ടികളെ നോക്കി അവരെല്ലാം വായ പൊത്തിചിരിക്കുന്നു. എന്തോ അപരാധം തന്‍റെ പേരില്‍ നടന്നിരിക്കുന്നു. !! സുബൈര്‍ തന്‍റെ നിരപരാധിത്വം ടീച്ചറോട് പറഞ്ഞു.

“ടീച്ചറെ ഞാനല്ല..!!

ടീച്ചറുടെ ദേഷ്യം ഇരട്ടിച്ചു.!! സുബൈറിന്‍റെ ചെവിയില്‍ പിടിച്ചു പുറത്തേക്ക് വലിച്ചു. സുബൈറിന്‍റെ കണ്ണില്‍ പൊന്നീച്ചപാറി. !!ചെവിയില്‍ പിടിച്ചു കൊണ്ട് തന്നെ സുബൈറിനെ ടീച്ചര്‍ ക്ലാസിന്‍റെ പുറത്താക്കി.!!

ഇനി രക്ഷിതാവിനെ വിളിച്ചു കൊണ്ട് വന്ന് ക്ലാസില്‍ കയറിയാല്‍ മതി എന്നും പറഞ്ഞു.!! പാവം..സുബൈര്‍ ചെയ്യാത്ത തെറ്റിന് ശിക്ഷ കിട്ടിയ വിഷമത്തില്‍ വീട്ടില്‍ ചെന്ന് ഉപ്പയോട്‌ കാര്യം പറഞ്ഞു..!! പറമ്പില്‍ തെങ്ങിന് തടം കെട്ടികൊണ്ടിരുന്ന ഉപ്പ ചെയ്യാത്ത കുറ്റത്തിനു മകനെ പുറത്താക്കിയ ടീച്ചറോടുള്ള ദേഷ്യം മനസ്സില്‍ വെച്ചു. !!പിറ്റേ ദിവസം സുബൈറിന്‍റെ കൂടെ സ്കൂളില്‍ ചെന്നു.!!

“എന്തിനാ ടീച്ചറെ ഇവനെ പുറത്താക്കിയത്?

മനസ്സിലുള്ള ദേഷ്യം പുറത്തുകാണിക്കാതെ ഉപ്പ ടിച്ചറോട് ചോദിച്ചു.!!

“ഇവന്‍ വന്നു വന്നു ക്ലാസില്‍ ഒരു ശ്രദ്ധയും ഇല്ലാതെ വഷളായിക്കൊണ്ടിരിക്കാ..
ഇന്നലെ ഞാന്‍ ക്ലാസ് എടുക്കുന്നതിനിടെ ഇവനോട് ചോദിച്ചു ആരാ..രാമായണം എഴുതിയതെന്നു..അതിനു ഇവന്‍ ഉത്തരം പറഞ്ഞത് 'ഞാനല്ല ടീച്ചറെ'..എന്നാ….

ടിച്ചര്‍ സുബൈറിനെ ദേഷ്യത്തോടെ നോക്കി കൊണ്ട് ഉപ്പയോട് പറഞ്ഞു.!!

ഇത് കേട്ട ഉടനെ..ഉപ്പ പറഞ്ഞു..!! “

“ടീച്ചറെ..ഞമ്മന്‍റെ മകനായത് കൊണ്ട് പറയല്ല..ഇവനതു ചെയ്യൂലാ അതെനിക്കുറപ്പാ ഇബന്‍റെ മൂത്തോന്‍ ഒരുത്തനുണ്ട് ഷുക്കൂര്‍ ..അവനാവും ചിലപ്പോള്‍ എഴുതിയത്!
മിനിഞ്ഞാന്ന് രാത്രി ഷുക്കൂര്‍ ഇരുന്നു എന്തോ..എഴുതുന്നത്‌ ഞമ്മളും കണ്ടതാ ടീച്ചറെ…ഇവന്‍ അങ്ങിനെയൊന്നും ചെയ്യില്ലാന്നു മാത്രമല്ല..മിനിയാന്ന് ഇവന്‍ പുരയില്‍ ഉണ്ടായിരുന്നിട്ടെ ഇല്ല ഓന്‍റെ ഉമ്മാന്റെ കുടീലായിരുന്നു. പിന്നെ എങ്ങിനെയാ..ടീച്ചറെ.. സുബൈര്‍ രാമായണം എഴുതാ..?

ഉപ്പയുടെ മറുപടിയും ചോദ്യവും കേട്ട മീരടീച്ചര്‍ ഞെട്ടിത്തരിച്ചു..!!

“ഉപ്പാ..നിങ്ങള്‍ പോയിക്കോളൂ..ഞാന്‍ സുബൈറിനെ ക്ലാസ്സില്‍ കയറ്റിക്കൊള്ളാം..

പുറത്തേക്ക് വന്ന പൊട്ടിച്ചിരി പാട് പെട്ട് കടിച്ചമര്‍ത്തി.സുബൈറിന്‍റെ ഉപ്പയെ നോക്കി ടീച്ചര്‍ പറഞ്ഞു!
സുബൈര്‍ പറഞ്ഞിട്ട് വിശ്വസിക്കാത്ത ടീച്ചര്‍ ഉപ്പയുടെ വാക്കുകള്‍ വിശ്വസിച്ചു എന്ന ആശ്വാസത്തില്‍ ഉപ്പ സുബൈറിനെ ഒന്ന് തലോടി വീട്ടിലേക്ക് മടങ്ങി. !! തന്‍റെ നിരപരാധിത്വം തെളിയിച്ചു എന്ന അഹംഭാവത്തില്‍ സുബൈര്‍ നെഞ്ച് വിരിച്ച് ക്ലാസ് മുറിയിലേക്കും കയറി.!!

"അവന്‍ വരും..വരാതിരിക്കില്ല!!

2010-03-25T20:46:00.001+03:00

കോളേജ് ഫെസ്റ്റ് അടുത്തതോടെ കലാപരിപാടിക്ക്‌ പേര് കൊടുത്ത വിദ്യാര്‍ത്ഥികളെല്ലാം റിഹേഴ്സല്‍ തിരക്കിലാണ്.! ഇത് കണ്ട ബാബുവിനും ഒരു നാടകത്തില്‍ അഭിനയിക്കണമെന്നു തോന്നി.
ബാബു സുഹൃത്തായ ഫൈസലിനോട് കാര്യം പറഞ്ഞു..!!

“നമുക്കും ഒരു നാടകത്തിനു പേര് കൊടുക്കാം. റിഹേഴ്സലിന്‍റെ പേരില്‍ പേടികൂടാതെ ക്ലാസ് കട്ട്‌ ചെയ്യാമല്ലോ…

ഫൈസലിനും സംഗതി കൊള്ളാമെന്നു തോന്നി.!!

അങ്ങിനെ ബാബുവും ഫൈസലും മറ്റു കൂട്ടുകാരുമായി ആലോചിച്ചു നാടകത്തിനു പേര് കൊടുത്തു.!
പിറ്റേ ദിവസം മുതല്‍ നാടകറിഹേഴ്സലിന്‍റെ പേരില്‍ അവര്‍ ക്ലാസ് കട്ട്‌ ചെയ്യാന്‍ തുടങ്ങി.!!
എല്ലാ ദിവസവും ക്ലാസ്സില്‍ നിന്നിറങ്ങി സിനിമാടാക്കീസുകള്‍ മാറി മാറി കയറീ എന്നല്ലാതെ നാടക റിഹേഴ്സലിനെ കുറിച്ച് അവര്‍ ചിന്തിച്ചതേയില്ല .!!

അങ്ങിനെ ഫെസ്റ്റിന്റെ ദിവസം അടുത്തെത്തി..!!
അപ്പോഴാണ് അവരെ നാടകം പഠിപ്പിക്കാമെന്ന് ഏറ്റിരുന്ന വാസു മാഷ്‌ കാലുമാറിയ വിവരം അവര്‍ അറിയുന്നത്.!!
ഇനി എങ്ങിനെ പ്രിന്‍സിപ്പാളിനോട് വിവരം പറയും..?
നാടകത്തിന്റെ പേരില്‍ എത്ര എത്ര ക്ലാസുകള്‍ കട്ട് ചെയ്തു. !!

പ്രിന്‍സിപ്പാള്‍ ആളൊരു ചൂടനാണ്‌..ദേഷ്യം വന്നാല്‍ അടിയല്ല നല്ല ഇടിയാണ് പതിവ്.!!

അതുകൊണ്ട് നാടകം പടിപ്പിക്കാമെന്ന് ഏറ്റ വാസു മാഷ്‌ കാലു മാറിയ വിവരം തുറന്നു പറയാനൊക്കില്ല.!! ഇനി എന്തു ചെയ്യും ?അവര്‍ ധര്‍മ്മ സങ്കടത്തിലായി.!!

കൂട്ടുകാരെല്ലാം ഭയന്ന് ബാബുവിന്‍റെ ചുറ്റും കൂടി കൂട്ടത്തില്‍ ധൈര്യശാലി ബാബു തന്നെയാണ്.
മാത്രവുമല്ല ഇതിനെല്ലാം കാരണക്കാരനും അവന്‍ തന്നെയല്ലെ...!

“നിങ്ങള്‍ വിഷമിക്കേണ്ട -അത് എനിക്ക് വിട്ടേക്ക് ഞാന്‍ കൈകാര്യം ചെയ്തോളാം..

തൊലിക്കട്ടിയുടെ കാര്യത്തില്‍ ഒരു കുറവും ഇല്ലാത്ത ബാബു കൂട്ടുകാര്‍ക്ക് ധൈര്യം പകര്‍ന്നു.!! അവര്‍ക്ക് സമാധാനമായി ബാബു എന്തെങ്കിലും ഐഡിയ കണ്ടുകൊള്ളും.!

അങ്ങിനെ കാത്തിരുന്ന ആ കലോത്സവ ദിവസം വന്നെത്തി..!!
വേദിയില്‍ കലാപരിപാടികള്‍ ഓരോന്നായി അരങ്ങേറികൊണ്ടിരുന്നു.! അടുത്തത് ബാബുവിന്‍റെയും കൂട്ടുകാരുടേയും നാടകം.!!

കര്‍ട്ടന്‍ മെല്ലെ മെല്ലെ ഉയര്‍ന്നു..!! ..നീളന്‍ ജുബ്ബയും മുണ്ടും വലിയൊരു കണ്ണടയും തോളില്‍ ഒരു സഞ്ചിയുമായ് ബാബു സ്റ്റേജില്‍ എത്തി ! വേദിയില്‍ പിന്നണി സംഗീതം മുഴങ്ങികൊണ്ടിരുന്നു.!!
ബാബു പതുക്കെ പതുക്കെ വേദിയിലുള്ള ബെഞ്ചില്‍ വന്നിരുന്നു. വലിയ ഒരു നാടക നടന്‍റെ ഭാവത്തില്‍.!! .കാണികളെല്ലാം ആകാംശയോടെ നോക്കിക്കൊണ്ടിരിക്കുന്നു.!!
ഫൈസലിനും മറ്റ് കൂട്ടുകാര്‍ക്കും ഹൃദയമിടിപ്പിന്‍റെ വേഗത കൂടിക്കൂടി വന്നു.!!..ഇവനെന്താണാവോ ചെയ്യാന്‍ പോവുന്നത് എന്നോര്‍ത്ത്.!!!
വേദിയിലെ പിന്നണി സംഗീതവും ആസ്വദിച്ച് ബാബു അനങ്ങാതെ ഇരുന്നു. കുറച്ച് നേരം അതേ ഇരുത്തം പിന്നെ പതുക്കെ എഴുന്നേറ്റ് മൈക്ക് കെട്ടിയിട്ട ഭാഗത്തേക്ക് വന്നു ഒരൊറ്റ ഡയലോഗ്..

"അവന്‍ വരും..വരാതിരിക്കില്ല"!!!

ബാബു ഉച്ചത്തില്‍ പറഞ്ഞു. എന്നിട്ട് വീണ്ടും അതേ ബെഞ്ചില്‍ പോയിരുന്നു.!!

പിന്നെയും മിനുറ്റുകള്‍ക്ക് ശേഷം മൈക്കിനടുത്തേക്ക് വന്നു അതേ ഡയലോഗ് തന്നെ.!!.

“അവന്‍ വരും..വരാതിരിക്കില്ല!!

ബാബു ഒരു കൂസലുമില്ലാതെ വീണ്ടും അതേ ബെഞ്ചില്‍ പോയി ഇരുന്നു.!!

കാണികള്‍ മുറുമുറുപ്പും സംസാരവും തുടങ്ങി..!! പ്രിന്‍സിപ്പാള്‍ മുന്നില്‍ തന്നെ ഇരിപ്പുണ്ട്. കാണികളില്‍ ചിലര്‍ കൂവാന്‍ തുടങ്ങി.!!
ബാബു പതുക്കെ ബെഞ്ചില്‍ നിന്നും എഴുന്നേറ്റു ..രണ്ടു ചെരിപ്പും തോളിലുള്ള സഞ്ചിയും കയ്യില്‍ പിടിച്ചു.എന്നിട്ട് കര്‍ട്ടന്‍ വലിക്കുന്ന കുമാരന്‍റെ അടുത്ത് ചെന്നു..

“വരുമെന്ന് കരുതിയിരുന്നു..പക്ഷെ..വരാമെന്ന് പറഞ്ഞ ആളെ കാണുന്നില്ല… നിങ്ങള്‍ കര്‍ട്ടന്‍ താഴ്ത്തിയേക്കൂ...

കുമാരന്‍ കര്‍ട്ടന്‍ താഴ്ത്താന്‍ തുടങ്ങിയതും ബാബു കയ്യിലുള്ള ചെരിപ്പും സഞ്ചിയും പിടിച്ചു ഒരൊറ്റ ഓട്ടം.!!
ഫൈസലും കൂട്ടുകാരും മുകളിലത്തെ നിലയില്‍ നിന്നും എല്ലാം നോക്കികാണുകയായിരുന്നു.!! പിറ്റേ ദിവസം പ്രിന്‍സിപ്പാള്‍ ബാബുവിനെ ഓഫീസ് റൂമില്‍ വിളിപ്പിച്ചു.

“ നീ നാളെ രക്ഷിതാവിനെ കൊണ്ട് വന്ന് ക്ലാസ്സില്‍ കയറിയാല്‍ മതി..

പ്രന്‍സിപ്പാള്‍ ദേഷ്യത്തില്‍ തന്നെയാണ്..!!

“സാര്‍ ഞാനൊരു തെറ്റും ചെയ്തിട്ടില്ല. എന്‍റെ ഭാഗം ഞാന്‍ നന്നായി അഭിനയിച്ചില്ലേ..?
വരാമെന്ന് പറഞ്ഞ ആ.,, കഴുവേറി മോന്‍ വരാത്തതിനു ഞാനെന്തു ചെയ്യാനാ ..

ബാബുവിന്‍റെ ഉത്തരം കേട്ട പ്രന്‍സിപ്പാള്‍…..വായ് പൊളിച്ചു നിന്നു പോയി.!!

ഒരു പെരുന്നാള്‍ രാവിന്‍റെ ഓര്‍മയില്‍….

2010-03-04T20:24:00.004+03:00

ഇരുപത്തിഒന്‍പത് ദിവസത്തെ വൃതത്തിനു വിരാമം അറിയിച്ചു കൊണ്ട് ആകാശത്ത് റംസാന്‍ ചന്ദ്രിക മിന്നി മറഞ്ഞു. പള്ളിയില്‍ ചെറിയപെരുന്നാള്‍ സന്ദേശം അറിയിച്ചു കൊണ്ട് തഖ്ബീര്‍ ധ്വനി മുഴങ്ങി.ചെറിയപെരുന്നാളിന്‍റെ ആഘോഷത്തിനു തുടക്കമായി . അയല്‍പക്കത്തെ കുട്ടികള്‍ കയ്യില്‍ മൈലാഞ്ചിയിട്ടും, പടക്കം പൊട്ടിച്ചും പെരുന്നാളാഘോഷം തുടങ്ങി കഴിഞ്ഞു. !

നേരം വെളുത്താല്‍ പെരുന്നാളാണ്. അരിയും സാധനങ്ങളും ഇതുവരെയും കിട്ടിയിട്ടില്ല . നഫീസുവിന്‍റെ മനസ്സിലെ തീ ആളിക്കത്തികൊണ്ടിരുന്നു. മാനുക്ക രാവിലെ പോയതാണ് ഇതുവരെയും വന്നിട്ടില്ല. സുബൈര്‍ പുതിയ കുപ്പായം കിട്ടാത്തത് കൊണ്ട് ചിണുങ്ങിയും കരഞ്ഞും ഇടയ്ക്കിടയ്ക്കു ഉപ്പ വരുന്നുണ്ടോ എന്ന് നോക്കി ഇടവഴിയിലേക്ക് കണ്ണും നട്ടിരിപ്പാണ്. നഫീസു ഓലപ്പുരയുടെ ഇറയത്തിറങ്ങി ഇടവഴിക്കപ്പുറത്തെ പാടവരമ്പിലേക്ക് നോക്കി . ഇല്ല മാനുക്കാനെ കാണുന്നില്ല..!!

“ഉമ്മാ ഉപ്പ വരുമ്പോ പുത്തന്‍കുപ്പായം കൊണ്ടരില്ലെ ?

സുബൈര്‍ ചിണുങ്ങികൊണ്ട് ഉമ്മന്‍റെ അരികിലേക്ക് ചെന്ന് ഉമ്മാടെ അരയില്‍ രണ്ട് കൈകൊണ്ടും വട്ടം ചുറ്റിപ്പിടിച്ചു. തേങ്ങി കൊണ്ട് ചോദിച്ചു.

“കൊണ്ടരും ഉമ്മാടെ കുട്ടിക്ക് ഉപ്പ വരുമ്പോ പുതിയ കുപ്പായം കൊണ്ടരും മുത്ത് കരയണ്ട..

സുബൈറിന്‍റെ തലയിലൂടെ സ്നേഹത്തോടെ കൈവിരല്‍ ഓടിച്ചു കൊണ്ട് നഫീസു മകനെ സമാധാനിപ്പിച്ചു !!.

മാനുക്കാക്ക് കാലിച്ചാക്കുകള്‍ കുറഞ്ഞ വിലയ്ക്കു വാങ്ങി അത് തുന്നിക്കൂട്ടി വില്‍ക്കുന്ന ജോലിയാണ്.പുരയില്‍ നിന്നും അതിരാവിലെ പോയാല്‍ നേരം ഇരുട്ടിയിട്ടെ വരികയുള്ളൂ.. മാനു തിരിച്ച് വരുന്നത് വരെ നഫീസുവിന് ആദിയാണ്. ആസ്ത്മ രോഗമുള്ള ആളാണ് ഇടയ്ക്ക് ശ്വാസം വലിക്കാന്‍ മാനുക്ക പെടാപ്പാട് പെടും. ഇന്‍ഹേലര്‍ വായിലേക്കടിച്ചാല്‍ ശ്വാസം മുട്ടിനു സമാധാനം ഉണ്ടാവും എപ്പോഴും അതും കീശയിലിട്ടാണു നടപ്പ് . ചാക്ക് വിറ്റുകിട്ടുന്ന കാശില്‍ ഭൂരിഭാഗവും മരുന്നു വാങ്ങി കഴിയും എന്നാലും സന്തോഷത്തോടയാണ് അവരുടെ ജീവിതം. സുബൈറിലാണു അവരുടെ പ്രതീക്ഷ മുഴുവന്‍. അവനിപ്പോള്‍ മൂന്നാം ക്ലാസിലാണ് നന്നായി പഠിക്കാന്‍ മിടുക്കുള്ള കുട്ടിയാ എന്ന് നെടുങ്ങാടിമാഷ് മാനുവിനെ കാണുമ്പോഴെല്ലാം പറയാറുണ്ട്.

നോമ്പ് നോറ്റ് പോയതാ സാധാരണ വരുന്ന സമയവും കഴിഞ്ഞിരിക്കുന്നു. “പടച്ചോനെ എന്‍റെ മാനുക്കാനെ നീ കാക്കണേ.. നഫീസു നെടുവീര്‍പ്പോടെ മാനുക്കാനെ കാത്തിരുന്നു.

“ നഫീസൂ ,,,, മാനു വന്നില്ലെ ?

അയല്‍പകത്തെ റുഖിയാത്തയാണ്. കയ്യില്‍ ഒരു സഞ്ചിയും ഉണ്ട് അതു നഫീസുവിന്‍റെ നേരെ നീട്ടി.

“ഇതാ ,,, ഫിത്വര്‍ ‍സക്കാത്തിന്‍റെ അരിയാണ്.”

നഫീസു സഞ്ചി വാങ്ങി റുഖിയാത്തയോട് കയറിയിരിക്കാന്‍ പറഞ്ഞു.

“ഇല്ല ഇരിക്കുന്നില്ല പോവാണ് കുട്ടികള്‍ എല്ലാരും വന്നിട്ടുണ്ടവിടെ .

“ഇവനെന്തിനാ കരയുന്നത് ?

തിരിഞ്ഞു പോവാന്‍ തുനിഞ്ഞ റുഖിയാത്ത സുബൈറിനെ നോക്കി ചോദിച്ചു.

നഫീസു മറുപടി ഒന്നും പറഞ്ഞില്ല . എങ്കിലും റുഖിയാത്താക്ക് കാര്യം മനസ്സിലായി പിന്നെ ഒന്നും ചോദിക്കാന്‍ നിന്നില്ല. സുബൈറിന്‍റെ നിശ്കളങ്കമായ മുഖത്ത് നോക്കി ഒന്നു പുഞ്ചിരിച്ചു. സുബൈര്‍ കണ്ണില്‍ നിന്നും ഒലിച്ചിറങ്ങിയിരുന്ന കണ്ണുനീര്‍ പുറംകൈ കൊണ്ട് തുടച്ചു ഉമ്മാടെ അടുത്തേക്ക് കൂടുതല്‍ നീങ്ങി നിന്നു.റുഖിയാത്ത യാത്ര പറഞ്ഞു പോയി. നഫീസു സുബൈറിനെയും വിളിച്ച് പുരക്കകത്തേക്ക് കയറി.

കിട്ടിയ ചാക്കുകള്‍ എല്ലാം കടയില്‍ കൊടുത്ത് അവിടന്ന് കിട്ടിയ കാശുമായി മാനു അടുത്ത് കണ്ട ടെക്സ്റ്റൈല്‍സിലേക്ക് കയറി . സുബൈറിന് ഒരു ഷര്‍ട്ടും ട്രൌസറും എടുത്തു നഫീസുവിനു ഒരു സാരിയും. എല്ലാ ചെറിയ പെരുന്നാള്‍ക്കും നഫീസുവിനു ഒരു സാരിയുണ്ടാവും പെരുന്നാള്‍ കഴിഞ്ഞാല്‍ നഫീസു അതു എടുത്ത് വെക്കും ബലിപെരുന്നാളുവരെ ബലി പെരുന്നാളിനു പുതിയത് വാങ്ങില്ല. മാനു വാങ്ങിക്കാം എന്നു പറഞ്ഞാലും ഭര്‍ത്താവിന്‍റെ കഷ്ടപ്പാട് ശരിക്കറിയുന്ന നഫീസു സമ്മതിക്കില്ല.

ബാക്കി വന്ന കാശുകൊണ്ട് അത്യാവശ്യം വേണ്ട വീട്ടു സാധനങ്ങളും വാങ്ങി പെരുന്നാള്‍ തിരക്കില്‍ മുങ്ങിയ അങ്ങടിയില്‍ കൂടി മാനു പുരയിലേക്ക് നടന്നു. സുബൈര്‍ ഉറങ്ങുന്നതിനു മുന്‍പ് ചെല്ലണം രാവിലെ പോരുമ്പോള്‍ അവനോട് പുത്തന്‍ കുപ്പായവുമായി നേരത്തെ വരാം എന്നു പറഞ്ഞു പോന്നതാ. പ്രതീക്ഷിച്ചത്ര ചാക്കുകള്‍ കിട്ടിയില്ല സമയം ഒരുപാട് വൈകി .. പാവം കരയുന്നുണ്ടാവും.. മാനു നടത്തത്തിനു വേഗത കൂട്ടി.

“മാനൂ…. നില്‍ക്കൂ..ഞാനും ഉണ്ട്.

പിറകില്‍ സുകുമാരന്‍. പപ്പടകച്ചവടം കഴിഞ്ഞ് സുകുമാരന്‍ കാലിവട്ടിയുമായ് മാനുവിന്‍റെ അടുത്തേക്ക് ഓടി വന്നു . സാധാരണ തൃസന്ധ്യയാവുന്നതിനു മുന്‍പ് വീടണയുന്ന സുകുമാരന്‍ പെരുന്നാള്‍ കച്ചവടമായത് കൊണ്ട് വൈകിയതാണ്. കൂട്ടിനു ആളെ നോക്കി വഴിയില്‍ നില്‍ക്കുവായിരുന്നു . അവര്‍ ഒരോരോ കാര്യങ്ങള്‍ സംസാരിച്ചു കൊണ്ട് നടന്നു. ടാറിട്ട റോഡില്‍ നിന്നും ചെങ്കല്‍പാതയിലേക്ക് കയറി. ചെങ്കല്‍ പാത അവസാനിക്കുന്നിടത്ത് സുകുമാരന്‍റെ വീട്. പിന്നെ പാടവരമ്പിലൂടെ കുറച്ചു കൂടി നടന്ന് ഇടവഴിയില്‍ കയറിയാല്‍ മാനുവിന്‍റെ പുര.

സുകുമാരന്‍റെ വീട്ടിന്‍റെ മുന്‍പില്‍ എത്തി.

“മാനൂ ഒരു ചൂട്ട് കത്തിച്ചിട്ട് പോവാം വരമ്പിലൂടെ പോവണ്ടതല്ലെ?

വീട്ടിലേക്ക് കയറും മുന്‍പ് സുകുമാരന്‍ മാനുവിനോട് പറഞ്ഞു.

“വേണ്ട.. കുട്ടിക്കാലം മുതല്‍ നടക്കുന്ന വരമ്പല്ലെ കണ്ണുചിമ്മി നടന്നാലും ഒരല്‍പ്പം പിഴക്കില്ല. സുകുമാരനെ നോക്കി ചിരിച്ചുകൊണ്ട് മാനു പറഞ്ഞു

ഇരുട്ടില്‍ പാടവരമ്പിലൂടെ മാനു നടന്നു . വരമ്പു കഴിഞ്ഞ് ഇടവഴിയിലേക്ക് കയറിയ മാനുവിന്‍റെ കാലില്‍ എന്തോ തട്ടിയത് പോലെ ..!! കാലിനടിയില്‍ കൂടി എന്തോ ഇഴഞ്ഞു പോവുകയും ചെയ്തു. മാനുവിന്‍റെ നെഞ്ച് പിടച്ചു..!! കയ്യില്‍ ഉണ്ടായിരുന്ന സഞ്ചികള്‍ താഴെയിട്ടു . .മാനു ഇടതുകാല്‍ കൂട്ടിപിടിച്ച് താഴെ ഇരുന്നു !!.. പടച്ചോനെ പാമ്പ്..!!

“നഫീസൂ....... മാനു ഉറക്കെ വിളിച്ചു..

സുബൈറിനു ചോറ് കൊടുത്ത് ഉറക്കാന്‍ കിടത്തി മാനുക്കാനെ കാത്തിരുന്നിരുന്ന നഫീസു വിളി കേട്ടു.. ചിമ്മിനി വിളക്കുമായി പുറത്തിറങ്ങി ഇടവഴിയില്‍ മാനുക്ക വീണുകിടക്കുന്നു നഫീസു ഓടിചെന്നു.

“നഫീസൂ,,, കാആലില്‍…!!!

മാനു വാക്കുകള്‍ മുഴുവനാക്കുന്നതിനു മുന്‍പേ നഫീസു പൊട്ടിക്കരഞ്ഞു.ബോധമറ്റ് താഴെ വീണു. ഇടവഴിയില്‍ നിന്നും ശബ്ദം കേട്ട് റുഖിയാത്ത പുറത്തിറങ്ങി നോക്കി.ഇട വഴിയിലേക്ക് ഓടിചെന്നു. കൂടെ റുഖിയാത്തയുടെ മകന്‍ ബഷീറും ഇടവഴിയില്‍ കിടന്ന് പുളയുന്ന മാനുവിനെ താങ്ങിയെടുത്തു തോളിലുണ്ടായിരുന്ന മുണ്ട്കൊണ്ട് കാലില്‍ വരിഞ്ഞ് കെട്ടി. റുഖിയാത്തയും അയല്‍പക്കത്തെ മറ്റു പെണ്ണുങ്ങളും കൂടി നഫീസുവിനെ താങ്ങിയെടുത്ത് വീട്ടിനകത്തേക്ക് കൊണ്ട് പോയി. ശബ്ദം കേട്ട് ഓടിയെത്തിയവര്‍ എല്ലാവരും കൂടി മാനുവിനെ ഒരു മരക്കസേരയില്‍ ഇരുത്തി താങ്ങിപ്പിടിച്ച് പാടവരമ്പിലൂടെ ഓടി.. താഴെ വീണുകിടന്നിരുന്ന സഞ്ചികള്‍ എല്ലാം കൂടി പെറുക്കിയെടുത്ത് റുഖിയാത്തയുടെ മരുമകള്‍ നഫീസുവിന്‍റെ പുരക്കകത്ത് കൊണ്ട് വെച്ചു.

കുട്ടന്‍ വൈദ്യര്‍ നേരത്തെ കിടന്നുറക്കമായിരുന്നു പുറത്ത് ആളുകളുടെ കാല്‍ പെരുമാറ്റംകേട്ട് വൈദ്യര്‍ ഉണര്‍ന്നു വാതില്‍ തുറന്നു. മാനുവിനെ വരാന്തയില്‍ കിടന്നിരുന്ന മരകട്ടിലിലേക്ക് കിടത്തി.

“എന്ത് വിഷാ തീണ്ട്യാത്ന്നറിയോ ?

വൈദ്യര്‍ കൂടെ വന്നവരോട് ചോദിച്ചു. അവര്‍ പരസ്പ്പരം മുഖത്തോട് മുഖം നോക്കി.

“ഇല്ല ,, ആരും കണ്ടില്ല.

വൈദ്യര്‍ എന്തൊക്കയോ പച്ചമരുന്നുകള്‍ അരച്ചു മാനുവിന്‍റെ കാലില്‍ പുരട്ടി. മാനുവിന്‍റെ നില കൂടുതല്‍ വഷളായി തുടങ്ങി .. വായില്‍ കൂടി രക്തവും നുരയും കൂടി കലര്‍ന്നു പുറത്ത് വന്നുകൊണ്ടിരുന്നു.!! കണ്ണുകളില്‍ ഇരുട്ട് കയറി. അവ്യക്തമായ ശബ്ദത്തില്‍ നഫീസുവിനെയും സുബൈറിനെയും വിളിച്ച്കൊണ്ടിരുന്നു. പതിയെ പതിയെ ഓര്‍മ നഷടമായി തുടങ്ങി.!!

“രക്ഷയില്ല.. കൂടിയ ഇനമാ…

വൈദ്യര്‍ തന്‍റെ നിസ്സഹായാവസ്ഥ കൂടെ വന്ന ഒരാളെ വിളിച്ച് രഹസ്യമായ് പറഞ്ഞു.

ഓര്‍മ തിരിച്ചു കിട്ടിയ നഫീസു മാനുക്കാനെ വിളിച്ചു കരഞ്ഞു. ഉമ്മാടെ കരച്ചില്‍ കേട്ട് സുബൈര്‍ ഉണര്‍ന്നു കാര്യമറിയാതെ അവന്‍ പകച്ചിരുന്നു. നഫീസു മകനെ കെട്ടിപ്പിടിച്ച് പൊട്ടിപൊട്ടികരഞ്ഞു.സുബൈറും കരയാന്‍ തുടങ്ങി. അടുത്ത് നില്‍ക്കുന്ന പെണ്ണുങ്ങള്‍ എങ്ങനെ അവരെ സമാധാനിപ്പിക്കണം എന്നറിയാതെ വിശമിച്ചു. നേരം പുലരാന്‍ അധികം സമയമില്ല മാനുക്കാടെ കൂടെ പോയിരുന്ന ബഷീര്‍ തിരിച്ചു വന്നു റുഖിയാത്താനെ പുറത്തേക്ക് വിളിച്ചു.

“ഉമ്മാ…. മാനുക്ക……. മാനുക്ക പോയി,!!!

റുഖിയാത്ത തരിച്ചിരുന്നു. എങ്ങനെ നഫീസുവിനെ അറിയിക്കും.!!

പള്ളിയില്‍‍ സുബ്ഹി ബാങ്ക് മുഴങ്ങി.. മാനുവിന്‍റെ പൊതിഞ്ഞുകെട്ടിയ ശരീരം പുരയുടെ ഉമ്മറത്ത് എത്തി. നഫീസു വാവിട്ടു കരഞ്ഞു. അവിടെ കൂടിയവരുടെയെല്ലാം കണ്ണില്‍ വെള്ളം നിറഞ്ഞു.!!

മാനുവിന്‍റെ മരണ വിവരം അറിയിച്ചുകൊണ്ട് കുഞ്ഞിമുഹമ്മദിന്‍റെ ജീപ്പ് നാട്ടിലൂടെ തലങ്ങും വിലങ്ങും ഓടി. പെരുന്നാള്‍ നമസ്ക്കാരത്തിന്‍റെ സമയം ആയെന്നറിയിച്ചു കൊണ്ട് പള്ളിയില്‍ തഖ്ബീര്‍ മുഴങ്ങികൊണ്ടിരുന്നു.!!

“സുബൈര്‍ എന്താ സ്വപ്നം കണ്ടിരിക്കുന്നത് ?

മുന്‍പില്‍ ഹക്കീം സാര്‍.

“ഹെയ് ഒന്നുമില്ല ചുമ്മാ പഴയകാര്യങ്ങള്‍ ഓരോന്ന്…

“നിന്നെ ബോസ് വിളിക്കുന്നുണ്ട്. നിന്‍റെ ലീവ് ശരിയായിട്ടുണ്ട്ന്ന് തോന്നുന്നു.

“ഉമ്മ ഇന്നു രാവിലെ വിളിച്ചപ്പോഴും ചോദിച്ചു പെരുന്നാളിനു വരുന്നില്ലെ എന്ന്. രണ്ട് വര്‍ഷം കഴിഞ്ഞില്ലെ അവധി കഴിഞ്ഞ് തിരിച്ചെത്തിയിട്ട്. ഇപ്പ്രാവശ്യം കുറച്ച് കൂടുതല്‍ നിന്നതുകൊണ്ട് വീടു പണി തീര്‍ക്കാന്‍ പറ്റി .

“വീടോ,,, അതിനു വീടെന്നാണോ പറയണ്ടത് കൊട്ടാരം എന്നു പറയൂ.. ഉമ്മ ഒറ്റയ്ക്കല്ലെ വീട്ടില്‍ ഉള്ളൂ ഇനി ഒരു കല്ല്യാണം ആവാം അല്ലെ ?

ഹക്കീംസാര്‍ സുബൈറിന്‍റെ തോളില്‍ തട്ടികൊണ്ട് പറഞ്ഞു. മരുഭൂമിയിലെ കണക്കുകളുടെയും പ്രൊജക്റ്റുകളുടെയും ഇടയില്‍ നിന്നും ഒരു താത്കാലിക മോചനം. സുബൈര്‍ ഹക്കീംസാറിനെ നോക്കി പുഞ്ചിരിച്ചു.

ഇരുപത്തിനാല് വര്‍ഷങ്ങള്‍ക്ക് മുന്‍പുള്ള ആ പെരുന്നാള്‍ രാവിന്‍റെ ഓര്‍മയില്‍ അടുത്ത പെരുന്നാള്‍ ഉമ്മാന്‍റെ കൂടെ കഴിയാം എന്ന സന്തോഷത്തില്‍ സുബൈര്‍ ബോസിന്‍റെ കാബിനിലേക്ക് നടന്നു.

ഒട്ടകത്തിനെതിരെ കേസ്

2010-02-26T19:36:00.000+03:00

ആടിനെ തൊഴിച്ച ഒട്ടകത്തിനെതിരെ സൌദി പൌരന്‍ കോടതിയെ സമീപിച്ചു.
ആദ്യമായാണ്‌ സൌദി കോടതിയില്‍ ഇത്തരമൊരു കേസ്.
വടക്കന്‍ അതിര്‍ത്തി പ്രവിശ്യയിലെ മരുഭൂമിയില്‍ താമസിക്കുന്ന സൌദി പൌരനാണ് പരാതിക്കാരന്‍.
മേഞ്ഞു നടക്കുന്നതിനിടെ അയല്‍വാസിയുടെ ഒട്ടകം തന്റെ ആടിനെ തൊഴിച്ചെന്ന പരാതിയുമായി
ലീന മര്‍കസ് പോലീസിനെയാണ് സൌദി പൌരന്‍ ആദ്യം സമീപിച്ചത്.
തൊഴിയേറ്റ് ആടിന്റെ വാരിയെല്ല് ഒടിഞ്ഞു.ആടിന് നടക്കാന്‍ കഴിയുന്നില്ല.
അയല്‍വാസിയില്‍ നിന്ന് നഷ്ട്ടപരിഹാരം ഈടാക്കിത്തരണം എന്നായിരുന്നു സൌദി പൌരന്റെ ആവശ്യം.
എതിര്‍ കക്ഷിയെ പോലീസ് സ്റെഷനിലെത്തിച്ചു നടത്തിയ ചോദ്യം ചെയ്യലില്‍ ഇങ്ങനെയൊരു സംഭവമുണ്ടായതായി
തനിക്കറിയില്ലെന്ന് അയാള്‍ വാദിച്ചു.തുടര്‍ന്ന് കേസ് കോടതിക്ക് കൈമാറാന്‍ പോലീസ് തീരുമാനിക്കുകയായിരുന്നു.
എങ്ങിനെ യുണ്ട് ഈ കേസ്.........?
ഇന്ന് മലയാളം ന്യുസില്‍ വന്ന ഒരു ചെറിയ വാര്‍ത്തയാണിത്.
വായിച്ചപ്പോള്‍ എന്തോ...ഒരു രസം തോന്നി.
എന്നാ പിന്നെ..ഇതൊന്നു പോസ്റ്റിയേക്കാം എന്ന് തീരുമാനിച്ചു.
വായിക്കാത്തവര്‍ വായിച്ചോളൂ...വായിച്ചവര്‍ക്ക് വീണ്ടും വായിക്കാം....

വിനയായ വിനാഗിരി

2010-01-21T02:40:00.002+03:00

ഉച്ച ഭക്ഷണം കഴിഞ്ഞു കൈയും മുഖവും കഴുകി വരുമ്പോഴാ...ഫോണ്‍ ബെല്ലടിക്കുന്ന ശബ്ദം കേട്ടത്.
ഞാന്‍ ഫോണെടുത്തു
ഹലോ....
സിനൂ ...ഇത് ഞാനാ...
ശബ്ദം കേട്ടപ്പോള്‍ എനിക്ക് മനസ്സിലായി ഫരീദ ഇത്താത്തയാണെന്ന്-
എന്തെ...ഇത്താത്താ...
ഇത്താത്ത പറഞ്ഞു..ശനിയാഴ്ച ശഹീദ വരുന്നുണ്ട്.
അവള്‍ നാട്ടില്‍ പോയിട്ട് നാലഞ്ചു മാസം ആയില്ലേ-
റൂമൊക്കെ പൊടിപിടിച്ചു കിടക്കായിരിക്കും.ഒന്ന് പോയി വൃത്തിയാക്കണം-
നീ വരുന്നോ..?
ശരി..ഞാനും വരാമെന്ന് സമ്മതിച്ചു.
അങ്ങിനെ...വ്യാഴായ്ച്ച വൈകുന്നേരം ഞങ്ങള്‍ ശഹീദ ഇത്തയുടെ വീട്ടിലേക്ക് പോയി.
അവിടെ ചെന്ന് പൊടി തട്ടലും വൃത്തിയാക്കലും എല്ലാം കഴിഞ്ഞപ്പോള്‍ നല്ല വിശപ്പ്..
ഇത്താത്ത മകനെ കടയിലേക്ക് പറഞ്ഞയച്ചു കപ്പയും മീനും വാങ്ങിപ്പിച്ചു.
അങ്ങിനെ...ഭക്ഷണം ഉണ്ടാക്കല്‍ കഴിഞ്ഞു വിളംബാന്‍ ഒരുങ്ങുമ്പോഴാണ് ചമ്മന്തി കൂടി ഉണ്ടായിരുന്നെങ്കില്‍ എന്ന് തോന്നിയത്.
പെട്ടന്ന് ഒരു ചമ്മന്തിയും തട്ടിക്കൂട്ടി.
ചമ്മന്തിയില്‍ ഒഴിക്കാനായി വിനാഗിരി അവിടെയെല്ലാം തപ്പി.ഒടുവില്‍ കുറച്ചു വിനാഗിരി ഉള്ള ഒരു കുപ്പി കിട്ടി-
അത് ചമ്മന്തിയില്‍ ഒഴിച്ച് ഞങ്ങള്‍ അഡ്ജസ്റ്റ് ചെയ്തു.
അന്നേരം..ഇത്താത്ത ആ ഒഴിഞ്ഞ കുപ്പിയില്‍ നോക്കികൊണ്ട് പറഞ്ഞു.
നമുക്ക് ഈ കുപ്പിയില്‍ പച്ചവെള്ളം ഒഴിച്ച് വെച്ച് ശഹീദയെ ഒന്ന് പറ്റിക്കാം..
അങ്ങിനെ ആ കുപ്പിയുടെ മുക്കാല്‍ ഭാഗം ഞങ്ങള്‍ വെള്ളം ഒഴിച്ച് അത് കിട്ടിയ സ്ഥലത്ത് തന്നെ കൊണ്ട് വെച്ചു.
രാത്രി ഞങ്ങള്‍ അവരവരുടെ റൂമിലോട്ട് പോന്നു.
ശഹീദ ഇത്ത നാട്ടില്‍ നിന്നും ശനിയാഴ്ച വന്നു.
ആഴ്ചകള്‍ രണ്ടുമൂന്നു കഴിഞ്ഞു...
ഒരു വെള്ളിയാഴ്ച ഉച്ചക്ക് ഞങ്ങളെല്ലാവരും ശഹീദ ഇത്തയുടെ വീട്ടില്‍ കൂടി-
അന്ന് ഉച്ചക്ക് ബിരിയാണിയിലേക്ക് ചമ്മന്തി ഉണ്ടാക്കി കൊണ്ടിരിക്കുമ്പോള്‍ ശഹീദ ഇത്ത പറഞ്ഞു.
നിങ്ങള്‍ക്കറിയോ?ഇവിടെ ഒരു സംഭവം ഉണ്ടായിട്ടോ...
കേള്‍ക്കാനുള്ള ആകാംക്ഷയില്‍ ഞാനും ഫരീദ ഇത്തയും ഒരുമിച്ചു ചോദിച്ചു.
എന്താ സംഭവിച്ചേ...?
ശഹീദ ഇത്ത വിവരിച്ചു തന്നു-
അത് ഇങ്ങിനെ....
എല്ലാ വെള്ളിയാഴ്ചയും പോലെത്തന്നെ ഇത്താത്ത ബിരിയാണി വെച്ച് അതിലേക്കു ചമ്മന്തിയും ഉണ്ടാക്കി.
ഒടുവില്‍ ചമ്മന്തിയിലേക്ക് വിനാഗിരി ഒഴിക്കാനായി കുപ്പി എടുത്തു-
ചമ്മന്തിയിലേക്ക് കുറച്ചു ഒഴിച്ച് ഇത്താത്ത രുചിച്ചു നോക്കി.
ചമ്മന്തിക്ക് വിനാഗിരിയുടെ ഒരു രുചിയും വന്നിട്ടില്ല..
വീണ്ടും കുറച്ചു കൂടെ ഒഴിച്ചു രുചിച്ചു നോക്കി.ഏയ്‌ ..പഴയ പടി തന്നെ ഒരു മാറ്റവും തോന്നിയില്ല-
മൂന്നാമതും ഒഴിച്ച് രുചിച്ചു നോക്കി.ചമ്മന്തി പഴയതിനേക്കാള്‍ മോശമായി....ചമ്മന്തി പാത്രത്തില്‍ കാല്‍ ഭാഗം വെള്ളം.
ഇത്താത്ത ഒമ്പതാം തരത്തില്‍ പഠിക്കുന്ന മകനെ വിളിച്ചു-
മോനെ...ഒന്ന് വന്നെ..
അവന്‍ വന്നു.
ഇത്താത്ത പറഞ്ഞു..ഈ ചമ്മന്തി ഒന്നു രുചിച്ചു നോക്കൂ..വിനാഗിരി എത്ര ഒഴിച്ചിട്ടും ഒരു പുളിയും തോന്നുന്നില്ല.
ഇനി എന്റെ വായക്കു എന്തെങ്കിലും പറ്റിയോ ആവോ..?
അവന്‍ ചമ്മന്തി രുചിച്ചു നോക്കി.ഉമ്മച്ചീടെ വായക്കു കുഴപ്പം ഇല്ലാന്ന് അവനു മനസ്സിലായി.
അവന്‍ വിനാഗിരികുപ്പി എടുത്ത് വാസനിച്ചു നോക്കി-
എന്നിട്ട് അത്ഭുതത്തോടെ..പറഞ്ഞു.
ഇത് അതു തെന്നെയാ...ഇത് അത് തെന്നെ ആയിരിക്കും-
ഇത്താത്തക്ക് ഒന്നും മനസ്സിലായില്ല.
എന്താ മോനെ...എന്താ നീയീ പറയുന്നേ...
എനിക്കൊന്നും മനസ്സിലായില്ലല്ലോ..?
അന്നേരം അവന്‍ പറഞ്ഞു.
ഉമ്മാ..നിങ്ങള്‍ കേട്ടിട്ടില്ലേ..വിനാഗിരി ഒത്തിരി നാള്‍ വെച്ചാല്‍ കള്ള് ആവുമെന്ന്-
അങ്ങിനെ ആയ കള്ള് ആണിത്.
കേട്ടപ്പോള്‍ ഇത്താത്തക്കും തോന്നി മകന്‍ പറഞ്ഞത് നേരായിരിക്കുമെന്ന്...
ഇത്താത്ത വേഗം ചമ്മന്തിപ്പാത്രവും വിനാഗിരി കുപ്പിയും എടുത്തു വേസ്റ്റ്ലേക്ക് ഇട്ടു.
ഇത്താത്ത പറഞ്ഞു തുടങ്ങിയപ്പോഴേ ഞങ്ങള്‍ക്ക് കാര്യം മനസ്സിലായി.
ഞങ്ങള്‍ വെള്ളം ഒഴിച്ച് വെച്ച കുപ്പിയാ ഇത്താത്ത എടുത്തത് എന്ന്..
ഞാനും ഫരീദ ഇത്തയും കള്ളച്ചിരിയോടെ മുഖത്തോട് മുഖം നോക്കുകയായിരുന്നു.
ശഹീദ ഇത്ത പറഞ്ഞു തീര്‍ന്നപ്പോള്‍ ഞങ്ങള്‍ നടന്ന കാര്യങ്ങളെല്ലാം തുറന്നു പറയുകയായിരുന്നു...
പറഞ്ഞു തീരും മുമ്പേ...ശഹീദ ഇത്ത ഞങ്ങളുടെ രണ്ടു പേരുടെയും മുഖത്തേക്ക് മാറി മാറി നോക്കി.
എടീ...............നിങ്ങളെ ഞാന്‍......................

മണ്ണാത്തന്‍ വല

2009-12-15T06:25:00.000+03:00

ഓരോരോ സ്ഥലങ്ങളിലും അവര്‍ക്ക് അവരുടെതായ ഓരോ ഭാഷകളുണ്ടാവുമല്ലോ ......ഇതുകാരണം എന്റെവിവാഹം കഴിഞ്ഞ ആദ്യ നാളുകളില്‍ അടുക്കളയില്‍ ഒത്തിരി അബദ്ധങ്ങള്‍ എനിക്ക് പറ്റിയിട്ടുണ്ട്.അതില്‍ ആദ്യ അനുഭവം എന്റെ ബ്ലോഗില്‍ തന്നെ ആദ്യ പോസ്റ്റായി ഇട്ടിട്ടുണ്ടായിരുന്നു .
ഇന്നിവിടെ കുറിക്കാന്‍ പോവുന്നതും എനിക്ക് പറ്റിയ ചെറിയ ഒരു അബദ്ധമാ...
വിവാഹം കഴിഞ്ഞു കുറച്ചു ദിവസങ്ങള്‍ക്ക് ശേഷം ഭര്‍ത്താവിന്റെ വീട്ടില്‍ ഒരു വൈകുന്നേരം .....
ഉമ്മ(ഭര്‍ത്താവിന്റെ)വൈകുന്നേര ചായക്കായി നെയ്യപ്പം ചുടാന്‍ മാവ് കലക്കി കൊണ്ടിരിക്കുന്ന തിരക്കിലാണ് അതേസമയം ഞാന്‍ ചീനച്ചട്ടി എടുത്ത് അടുപ്പില്‍ വെക്കാന്‍ ഒരുങ്ങുമ്പോഴാണ് കഴുകിയില്ലല്ലോ എന്ന ഓര്മ വന്നത്. ഞാന്‍ കഴുകാനായി ചട്ടി പൈപിനുചുവട്ടിലേക്ക്‌ കാണിക്കുമ്പോള്‍ ഉമ്മ പറഞ്ഞു..മോളെ...പുറത്ത് മണ്ണാത്തന്‍ ഉണ്ടോ നോക്ക്
അന്നേരം ആ ചട്ടി അവിടെ വെച്ച് ഞാന്‍ അടുക്കളയുടെ വാതിലിനടുത്തേക്ക് വന്നു പുറത്തേക്കു എത്തിനോക്കി.പക്ഷെ ആരെയും കണ്ടില്ല.പിന്നെ അടുക്കളയില്‍ നിന്നും രണ്ടു പടികളിറങ്ങി മുറ്റത്തെത്തി കണ്ണുകള്‍കൊണ്ട് എല്ലായിടത്തും പരതി നോക്കി അപ്പോഴും ആരെയും കണ്ടില്ല തിരിച്ചു അടുക്കളയിലെത്തിയപ്പോള്‍ എന്റെ ഭര്‍ത്താവ് ഇരുന്നു ചിരിക്കുന്നു എനിക്ക് കാര്യം ഒന്നും മനസ്സിലായില്ല.അന്നേരം ചിരി നിര്‍ത്തി ഭര്‍ത്താവ് എന്നോട് ചോദിച്ചു..നീ ആരെ തിരഞ്ഞാ പുറത്തേക്കു പോയതെന്ന്.അപ്പോള്‍ ഞാന്‍ പറയാ...മണ്ണാത്തനെ തിരഞ്ഞാണ് പുറത്തേക്കു പോയതെന്നു.അയ്യോ ...അന്നേരം അവിടെ കൂട്ടച്ചിരി ആയി.എനിക്കൊന്നും പിടുത്തം കിട്ടിയില്ലട്ടോ.ഞാന്‍ ചോദിച്ചു നിങ്ങളെന്തിനാ ചിരിക്കുന്നത് എന്ന് അപ്പോള്‍ ഭര്‍ത്താവ് പറയാ..നിന്നോട് ചട്ടിയുടെ പുറത്ത് മണ്ണാത്തന്‍വല ഉണ്ടോ എന്ന് നോക്കാനെല്ലേ പറഞ്ഞേത്‌.വല എന്ന് കേട്ടപ്പോള്‍ എനിക്ക് ഏകദേശം ഒരു രൂപം കിട്ടിട്ടോ..ഞാന്‍ ചോദിച്ചു എട്ടുകാലിക്കാണോ നിങ്ങള്‍ മണ്ണാത്തന്‍ എന്ന് പറയുന്നത് അപ്പോള്‍ അതെ എന്ന് പറഞ്ഞു അവര്‍
എനിക്കറിയില്ലല്ലോ എട്ടുകാലിക്ക് അവര്‍ മണ്ണാത്തന്‍ എന്നാണ് പറയുന്നത് എന്ന് ഞാന്‍ മണ്ണാത്തന്‍ എന്ന് കേട്ടപ്പോള്‍ ആരുടെയെങ്കിലും പേരാണെന്നാ കരുതിയത് അതെല്ലേ പുറത്തു പോയി നോക്കിയത്.
അത് കഴിഞ്ഞു പിറ്റേ ദിവസം...
വൈകീട്ട് അലക്കിയിട്ട തുണികള്‍ എടുത്ത് കൊണ്ടിരിക്കായിരുന്നു ഞാന്‍ ഓരോ ഡ്രസ്സും കയ്യിലേക്ക് അടുക്കി വെക്കുകയായിരുന്നു.അപ്പോഴാ...ഇത്താത്താന്റെ ഡ്രസ്സില്‍ കാക്ക കാഷ്ട്ടിച്ചത് കണ്ടത്.ഞാന്‍ എല്ലാ തുണികളും എടുത്തു അഴുക്കായത് ഒരു ഒരുഭാഗത്തെക്ക് നീക്കി..ഇത് കൊണ്ട് പോയി വെച്ചിട്ട് കഴുകി ഇടാമെന്ന് കരുതി.
തുണികളുമായി അകത്തേക്ക് കയറുമ്പോള്‍ ഇത്താത്തെയെ കണ്ടു.ഞാന്‍ ഇത്താത്തയോട് പറഞ്ഞു നിങ്ങളെ ഡ്രസ്സില്‍ കാക്കെയി കാഷ്ടിച്ചിട്ടുണ്ട് അതെടുത്തില്ലെട്ടോ എന്ന് പറഞ്ഞു.സത്യം പറഞ്ഞാല്‍ ഇത്താത്താക്ക് ഒന്നും മനസ്സിലാവാത്തെ പോലെ എന്റെ മുഖത്തേക്ക് തന്നെ നോക്കി .അന്നേരം ഞാന്‍ ആദ്യം പറഞ്ഞത് തന്നെ ഒന്നും കൂടി ആവര്‍ത്തിച്ചു പറഞ്ഞു.അപ്പോള്‍ ഇത്താത്ത ചോദിക്കാ എന്താ ഈ കാക്കെയി..അന്നേരം എനിക്ക് ഇന്നലെത്തെ കാര്യം ഓര്‍മ്മ വന്നു എനിക്ക് മണ്ണാത്തനെ മനസ്സിലാവാത്തെ പോലെ കാക്കെയിയെ ഇത്താത്തെക്കും മനസ്സിലായില്ലെന്ന്.ഞാന്‍ കാക്ക എന്ന് ഇത്താത്തെക്ക് തെളിയിയിച്ചു പറഞ്ഞു കൊടുത്തു.അപ്പോള്‍ ഇത്താത്ത ചോദിക്കാ കാക്കക്കാണോ നീ കാക്കെയി എന്ന് പറഞ്ഞത്..അതെ എന്ന് പറഞ്ഞപ്പോള്‍ ഇത്താത്ത പറയാ....അപ്പോള്‍ നിങ്ങള്‍ പൂച്ചക്ക് പൂച്ചെയി ....എന്നാണോ പറയുന്നതെന്ന് .............

ഒരോ൪മ്മ

2009-11-26T01:45:00.003+03:00

എല്ലാ ബ്ളോഗ് വായനക്കാ൪ക്കും എന്റെ ഈദ്മുബാറക്ക്

ആഘോഷങ്ങള് വരുംമ്ബോഴാണ് നാട് കൂടുതല് മിസ്സ് ചെയ്യുന്നത്.ഇവിടെ എന്തു പെരുന്നാള്.ഈ ഫ്ളാറ്റിന്റെ അടച്ചിട്ട മുറികള്ക്കുള്ളില് എന്താഘോഷം.പലരും പെരുന്നാള് ദിവസം ഇവിടെ ഉറങ്ങി തീ൪ക്കാറാണ് പതിവ്.ജോലിക്കും,വിരഹത്തിനും,ടെ൯ഷനുമിടയില് ആകെ കിട്ടുന്ന ഒഴിവുദിനമല്ലേ പാവങ്ങള് ഉറങ്ങട്ടെ......

നാട്ടില് കുട്ടി കാലത്തൊക്കെ പെരുന്നാള് എന്തു രസമായിരുന്നു. അടുത്ത വീടുകളിലെ കൂട്ടുകാരികളൊന്നിച്ച് ഏതെകിലും വേലിക്കരികിലേക്ക് മൈലാഞ്ചിഇല തപ്പി ഇറങ്ങും.ഇല ഊരിഇടാ൯ എല്ലാ വരുടേയും കയ്യില് ഒരു കവറും ഉണ്ടാവും.ഇല കിട്ടി കഴിഞ്ഞാല് പിന്നെ വീട്ടിലുള്ള ഉമ്മമാ൪ക്ക് ഒരു സ്വസ്ഥതയും കൊടുക്കില്ല അത് അരച്ചുതരാത്തതിലുള്ള ബഹളം ആയിരിക്കും.ചക്ക ഉണ്ടാവുന്ന കാലത്ത് വെളഞീ൯(ചക്കയുടെകറ)കൊള്ളിയില് ചുറ്റി വീടിന്റെ ഇറയത്ത് തിരുകി സൂക്ഷിക്കും.പെരുന്നാള് തലേന്നാണ് വെളഞ്ഞീ൯കൊള്ളി ഇറയത്ത് നിന്നും ഇറങ്ങുക.പിന്നെ അത് ഉരുക്കി ചൂടോടെ ഊതിഊതി ഉമ്മമാ൪ കയ്യില് ഡിസൈ൯ ചെയ്തുതരും മുകളില് മൈലാഞ്ചി പരത്തി ഇടും.മൈലാഞ്ചി ഇട്ട കൈ ഒരു കവറിനുള്ളിലാക്കിയാണ് കിടന്നുറങ്ങുക.അടുത്ത വീട്ടിലെ കൂട്ടുകാരൊക്കെ രാവിലെ വരും ആരുടെ കൈ ആണ് കൂടുതല് ചുവന്നതെന്നറിയാ൯ ഈ കയ്യിന് നല്ലൊരു വാസനയാണ്.

പിന്നെ മേലാകെ എണ്ണ തേച്ചുള്ള കുളിയും പുത്തനുടുപ്പ് ധരിക്കലും ആണുങ്ങളാണ൯കില് പളളിയില് പോവും.

പളളിയില് പോയവര് തിരിച്ചുവന്നാല് ഈണ് കഴിക്കാനൊരുങ്ങും.

കൊച്ചുളളിയും ഉലുവയുമിട്ട തേങ്ങാചോറും,കോഴിക്കറിയും,ഇറച്ചിവരട്ടിയതും കൂട്ടത്തില് വലിയൊരു പപ്പടവും ഉണ്ടാവും നിലത്ത് പായ വിരിച്ച് എല്ലാവരും ഒന്നിച്ചിരുന്നാണ് കഴിക്കുക

എല്ലാ വീട്ടീന്നും തേങ്ങാചോറിന്റെ മണം രാവിലെ തെന്നെവരും ചിലയിടത്ത് നെയ്ചോറായിരിക്കും.

പിന്നെ ബന്ധു വീടുകളില് പോവലും പടക്കംപൊട്ടിക്കലും കളിയും ചിരിയും വ൪ത്തമാനവുമായി എന്തു രസമായിരുന്നു അന്നത്തെ പെരുന്നാള്. ഇന്നത്തെ കുട്ടികള്ക്ക് ഇതൊന്നും അറിയില്ല ഉമ്മമാ൪ പറഞ്ഞു കൊടുക്കുന്ന ഒരോ൪മ്മ.......അതേ ഒളളൂ....

കിനാവ്

2009-11-19T01:15:00.002+03:00

എന്റെ ഹൈസ്കൂള്പഠനം ഉമ്മയുടെ വീട്ടില്നിന്നുകൊണ്ടായിരുന്നു കാരണം സ്കൂളിലേക്ക് 10മിനിറ്റ് നടക്കാനുള്ള ദൂരമേഉണ്ടായിരുന്നൊള്ളൂ ഉമ്മയുടെ ചേട്ടന്റെ(അമ്മാവന്റെ)വീട്ടിലായിരുന്നു താമസം അവിടെ മൂന്നുപെണ്കുട്ടികളുണ്ട് ഏറ്റവും ഇളയവളോടായിരുന്നു എനിക്ക് നല്ലകൂട്ട് കളിയുംചിരിയുമായി ഓരോദിവസവും ഞങ്ങള്ക്ക് നല്ല രസമായിരുന്നു അങ്ങിനെയിരിക്കേ ഞാന് പത്താം തരത്തില് പഠിക്കുന്ന സമയത്ത് ഒരുദിവസം ഞാ൯ തനിച്ച് എങ്ങോ നടന്നുപോവുകയാണ് എന്തോ ഒരു ശബ്ദം കേട്ട് ഞാ൯ തിരിഞ്ഞു നോക്കിയപ്പോള് രണ്ടു പോലീസുകാര് എന്നെ പിടിക്കാനായി എന്റെടുത്തേക്ക് ഓടിവരുന്നു ഇതുകണ്ട ഞാ൯ എന്നെ ഇപ്പോ പിടിക്കും എന്നഭയത്തില് ഞാനും ഓടി അങ്ങിനെ ഓടിഓടി ഒരു വലിയ മതിലിനടുത്താണ് എത്തിയത് ഞാ൯ അതില് അള്ളിപ്പിടിച്ച് കയറി മതിലിനു മുകളിലെത്തി താഴേക്ക് നോക്കിയപ്പോ ഒരു ഇടവഴി പിന്നെ ഒന്നും നോക്കിയില്ല മതിലിനു മുകളില്നിന്നും താഴെ ഇടവഴിയിലേക്ക് ഒരൊറ്റ ചാട്ടം പെട്ടെന്ന് ഒരല൪ച്ച അയ്യോ.....എന്റുമ്മാ.....ആ വലിയ ശബ്ദം കേട്ട് ഞാ൯ തട്ടിക്കുടഞ്ഞെഴുന്നേറ്റു നോക്കിയപ്പോ നല്ല ഇരുട്ട് അന്നേരം എന്റെടുത്ത് നിന്നും വീണ്ടും നിലവിളി ലൈറ്റ് ഇടെടീന്ന്...അപ്പോഴാണ് എനിക്ക് കാര്യം മനസ്സിലായത് ഞാ൯ ഇടവഴിയാണന്നു കരുതി ചാടിയത് കട്ടിലില്നിന്നും താഴേക്കാണ് താഴെ എന്റെ അമ്മാവന്റെ മകള് കിടക്കുന്നുണ്ടായിരുന്നു ചൂടു കാരണം അവള് താഴേക്ക് കിടന്നത് ഞാനറിഞ്ഞിട്ടില്ല അവളുടെ മുകളിലേക്കാണ് ഞാന് വീണത്.അതുകഴിഞ്ഞു അന്ന് രാവിലെ ഞാ൯ സ്കൂളിലേക്കു പോയി.ഉച്ചയൂണിനുവേണ്ടി വീട്ടിലേക്ക് വന്നപ്പോ അവളെ അവിടെങ്ങും കണ്ടില്ല അവളെവിടെ എന്നു തിരക്കിയപ്പോള് അവള്ക്ക് നെഞ്ചുവേദന ആയിട്ട് അമ്മായി ഹോസ്പിറ്റലിലേക്ക് കൊണ്ടുപോയിരിക്കുന്നു എന്നു പറഞ്ഞു തലേന്നത്തെ സംഭവം കാരണമാണോ നെഞ്ചുവേദന വന്നത് എന്ന് ഞാ൯ എന്നോടുതെന്നെ ചോദിക്കുകയായിരുന്നു.വീട്ടിലാരും അറിഞ്ഞ ഭാവം കാണുന്നില്ല.സ്കൂള്വിട്ടുവന്ന് ഇക്കാര്യം പറഞ്ഞു ചിരിക്കണം എന്ന് കരുതിയതായിരുന്നു പിന്നെ ഞാനൊന്നും പറഞ്ഞില്ല ഊണുകഴിഞ്ഞ് വിശമത്തോടെയാണ് ഞാന് സ്കൂളില് പോയത്.എന്റെ മനസ്സ് മുഴുവനും അവളെ കുറിച്ചായിരുന്നു അവള്ക്ക് എന്തായിരിക്കും പറ്റിയിട്ടുണ്ടാവുക എന്നുള്ള ചിന്തയായിരുന്നു.വൈകുംന്നേരം സ്കൂള്വിട്ട് പേടിയോടെയാണ് ഞാ൯ വീട്ടിലേക്കു നടന്നുനീങ്ങിയത് വീടിനു മുറ്റത്തെത്തിയപ്പോള് ഉമ്മറപ്പടിയില് ചിരിച്ചുകൊണ്ട് അവള് ഇരിക്കുന്നുണ്ടായിരുന്നു ഞാന് ഓടിച്ചെന്ന് അവളോട് കാര്യങ്ങള് തിരക്കി ഞാന് നിന്റെ മേലില് വീണതുകൊണ്ടാണോ നിനക്കു നെഞ്ചുവേദന വന്നത് ഹോസ്പിറ്റലില്പോയിട്ട് എന്തുപറഞ്ഞു അങ്ങിനെ ഒരുപാട് ചോദ്യങ്ങള് ഞാന് ചോദിച്ചു കൊണ്ടിരിക്കാണ്...അന്നേരം അവള് ഇടയ്ക്കു കേറിപറഞ്ഞു നീ വീണതുകാരണമല്ല വേദന വന്നത് നീര് കാരണമാണ് നെഞ്ചുവേദനയെന്ന്.അപ്പോഴാണ് എനിക്ക് എന്റെ നെഞ്ചിന്റെ പുകച്ചില് മാറിയത്.

സുന്ദരിയാവണ്ടെ

2009-11-04T09:04:00.005+03:00

നാരങ്ങാനീരും തക്കാളിനീരും സമം ചേ൪ത്ത് കണ്ണി൯ തടങ്ങളില്
പുരട്ടി 15മിനിററ് കഴിഞ്ഞശേഷം കഴുകി കളയുക കണ്ണി൯തടങ്ങളിലെ
കറുപ്പ് ഒഴിവാക്കാം
മുഖത്തെ പാടുകള് മാറാ൯ ആര്യവേപ്പിലയും പച്ചമഞ്ഞളും അരച്ച് ദിവസവും
മുഖത്ത് പുരട്ടുക
ഒരു ടീസ്പൂണ് വെളളരിക്കനീര് ഒരു ടീസ്പൂണ്തൈര് ഒരുനുളള് മഞ്ഞള്പൊടി അരക്കപ്പ്
തക്കാളിനീര് എന്നിവ മിക്സാക്കി മുഖത്തുതേക്കുക നല്ലനിറം കൈവരും
എളളിന്റെ ഇല അരച്ചു പുരട്ടുകയും എള്ളെണ്ണ പതിവായി തലയില് തേച്ചു
കുളിക്കുകയും ചെയ്യുക മുടി തഴച്ചുവളരും
മുടിക്കു കറുപ്പു നിറം ലഭിക്കാ൯ മൈലാഞ്ചിയില അരച്ചു വെളിച്ചെണ്ണ ചേ൪ത്ത്
കാച്ചി തലയില് പതിവായി തേയ്ക്കുക
ചെറുപയറ് പൊടിച്ചത് തൈരില് കലക്കി തലയില് തേച്ചു കഴുകുക താരന് പോവും
മുടികൊഴിച്ചില് മാറാ൯ കന്നിയില ഇടിച്ചുപിഴിഞ്ഞ് നീരെടുത്ത് സമം നല്ലെണ്ണയും
ചേ൪ത്ത് കാച്ചി ദിവസവും തലയില് തേച്ചു കുളിക്കുക മുടികൊഴിച്ചില് മാറുകയും
മുടി വളരുകയും ചെയ്യും

പൊടിക്കൈ

2009-11-02T07:18:00.005+03:00

പപ്പടത്തിനു നല്ല രുചിയും മഞനിറവും കിട്ടാന് പപ്പടം കാച്ചുന്ന വെളിച്ചെണ്ണയില് ഒരുടീസ്പൂണ് മഞ്ഞള്പൊടി ചേറ്ക്കുക

തേങപിഴിയുമ്ബോള് പാല് നല്ലവണ്ണം കിട്ടാന് അല്പം ഉപ്പ് ചേറ്ക്കുക

ഉണങിയ തേങപൊട്ടിക്കുമ്ബോള് ചിരട്ട വേറേയായി അടരാതിരിക്കാന് രണ്ട്മണിക്കൂറ് വെളളത്തില് ഇട്ട് വെക്കുക ഇതുകൊണ്ട് വേറൊരുലാഭവുമുണട് ഇങിനെചെയ്താല് തേങ്ങപൊട്ടിക്കുമ്ബോള് നേറ്പകുതിആയി അടറ്ന്ന് വരികയും ചെയ്യും

ചൂടുകാത്ത് പാല്പിരിയാതിരിക്കാന് പാല്തിളപ്പിക്കുന്നസമയത്ത് ഒരുനുളള് സോഡിയം ബൈകാറ്ബണേററ്ചേറ്ക്കുക പാല്പിരിയുകയില്ലന്നു മാത്റമല്ല ഉറയൊഴിച്ചാല് നല്ല കട്ടിയുളളതൈരും ലഭിക്കും

പെട്ടെന്നുവേവുന്ന അരിയാണന്കില് പകുതി വേവാവുമ്ബോള് അല്പംനല്ലെണ്ണ ഒഴിച്ചാല് ചോറ് കുഴയുകയില്ല

മീന് വറുക്കാനുളള അരപ്പില്ഒരു സ്പൂണ്ചെറുനാരങ്ങയുടെനീര് ചേറ്ത്താല് നല്ല രുചി ഉണ്ടാവുകയും പൊടിയാതേയും ഇരിക്കും

മീന് വററിക്കുന്നതില് ഒരുനുളള് ഉലുവാപൊടിചേറ്ത്താല് രുചി കൂടും

ചെറിയമീനുകള് കഴുകുമ്ബോള് കുറച്ചുപരലുപ്പും പുളിവെളളവും ഒഴിച്ചു കഴുകുക വേഗം അഴുക്ക് പോകും

ഉരുളക്കിഴങ്ങും കോളിഫ്ളവറും വേവിക്കുമ്ബോള് നിറം മാറാതിരിക്കാന് വേവിക്കുന്നവെളളത്തില് അല്പം വിന്നാഗിരിചേറ്ത്താല്മതി

പച്ചക്കറികള് അരിയുമ്ബോള് കത്തികൊണ്ട് കൈ മുറിഞ്ഞാല് അല്പ്പം കാപ്പിപ്പൊടി ഉടനെ വെച്ചുകെട്ടുക മുറിവ് പെട്ടെന്നുണങ്ങും

കുക്കറിനകത്തെ കറ പോവാന് കുക്കറില് പുളിവെളളം തിളപ്പിക്കുക

കരിഞ്ഞുപോയ പാത്തറം കഴുകിനന്നാക്കാനൊരു എളുപ്പവഴി .പാത്ത് റത്തില് അല്പം ബേക്കിങ്സോഡയും വെളളവും ചേറ്ത്ത് തിളപ്പിക്കുക പിന്നീട് ആറേഴുമണിക്കൂറ് കുതിരാന് വെച്ചിട്ട് കഴുകിയാല് പാടുകള് വേഗം നീങ്ങി ക്കിട്ടും

ബാഗിലും മററും തുന്നിപ്പിടിപ്പിച്ചിട്ടുളള സിബ്ബ് നീങ്ങാന് ബുദ്ധിമുട്ടുണ്ടകില് സിബ്ബിന്റെ പുറത്ത് മെഴുക് പുരട്ടിയാല്മതി

പാല് തുണിയില് വീണാല് തണുത്തവെളളവും സോപ്പും ഉപയോഗിച്ച് കഴുകിയാല് കറപോകും

ഇരുമ്ബുകറനീക്കാന് നാരങ്ങാനീര് പുരട്ടിയതിനുമീതെ ഉപ്പു പുരട്ടി വെയിലത്തിട്ടശേഷം കഴുകി എടുക്കുക

മഷിക്കറ നീക്കാന് ചെറുനാരങ്ങാനീര് ഉപ്പ് എന്നിവകൊണ്ട് ഉരസിയതിനു ശേഷം തൈരില്കുതിറ്ത്തി വയ്ക്കണം പിന്നീട് ചെറുചൂടുവെളളത്തില് കഴുകിഎടുക്കണം

തുന്നല്സൂചിയും മെഷീന്സൂചിയും തുരുമ്ബ് പിടിക്കാതിരിക്കാന് ഒരു ചെറിയകുപ്പിയില് വെളിച്ചെണ്ണയും മണ്ണെണ്ണയും മിക്സാക്കി സൂചി അതിലിട്ടുവെച്ചാല്മതി

സ്ററീല് പാത്റങ്ങള്ക്ക് തിളക്കം കിട്ടാന് വിനാഗിരി തുണിയില് മുക്കി തുടക്കുക

അച്ചാറുകള് നിറയ്ക്കുന്നതിനു മുൻബ് വിനാഗിരിയില് മുക്കിയ തുണികൊണ്ട് ജാറിന്റെ ഉള്വശം നന്നായിതുടക്കുക അച്ചാറ് കൂടുതല്നാള് കേട്കൂടാതെയിരിക്കും

സമൂസ ഉണടാക്കുംമ്ബോള് അല്പം റവ കൂട്ടിക്കുഴക്കുകയും എണ്ണെയില് ഒരു നുളള് അപ്പക്കാരം ചേറ്ക്കുകയും ചെയ്താല് സമൂസ നല്ല ക്റിസ്പ്പായിരിക്കും

പാലോ തൈരോ അധികംവന്നാല് ചപ്പാത്തിക്കു മാവു കുഴയ്ക്കുംമ്ബോള് കൂട്ടുക കൂടുതല് മാറ്ദ്ദവം ലഭിക്കും

അത്തിപ്പഴം കിസ്മിസ് എന്നീഉണങ്ങിയപഴങ്ങള് ഫ്റിഡ്ജില്സൂക്ഷിച്ചാല് അവ കൂടുതല് കാലം പുതുമ നഷ്ട് പ്പെടാതിരിക്കും

ഇറച്ചി വറക്കുന്ന എണ്ണെയില് അല്പം ഉപ്പ് ചേറ്ത്താല് ഇറച്ചി പൊട്ടിത്തെറിക്കില്ല

മീന് വറുക്കുംമ്ബോള് മുളകുപൊടികുറച്ച് കുരുമുളകുപൊടികൂടുതല് ചേറ്ത്തു വറക്കുക കൂടുതല് രുചി കിട്ടും

പച്ചക്കറി പാകം ചെയ്യുംമ്ബോള് ഒരു നുളള് പഞ്ചസാര ഇടുക അവയുടെ നിറം നഷ്ട് പ്പെടൂല

എണ്ണപ്പലഹാരങ്ങള് ഇടുന്ന ടിന്നില് അല്പം അരി വിതറുക പലഹാരങ്ങള് തണുക്കില്ല

കട്ടതൈര് ഉണ്ടാക്കാന് കാച്ചിയപാലില് വിററാമിന്ഗുളിക ഇട്ട് കുറേസമയം കഴിഞ്ഞ് നോക്കിയാല് നല്ല കട്ടതൈര്കിട്ടും കൂടുതല് പോഷകാംശവും കിട്ടും

ഇഡ്ഡലിമാവ് അരക്കുംമ്ബോള് അല്പം ഉലുവ കൂട്ടുക രുചി കൂടും

ഫ്ളാസ്ക്കിലെ ദുറ്ഗന്ധം അകററാന് ഒരു ടീസ്പൂണ് കടുക് അരച്ചു വെളളത്തില്കലക്കി ഫ്ളാസ്ക്കില് ഒഴിച്ച് വെച്ച് അടുത്തദിവസം കഴുകിഎടുക്കുക

മുറിച്ചതേങ്ങ കേടുകൂടാതെ സൂക്ഷിക്കാന് ഉപ്പ് പൊടി പുരട്ടിവെക്കുക

തേങ്ങയുടെ കണ്ണുളള ഭാഗം മേല്പോട്ടാക്കിവെക്കുക തേങ്ങഏറെനാള് കേടാവില്ല

ഞാന് ചമ്മിയ ഒരോറ്മയുമായി

2009-10-31T18:11:00.000+03:00

എന്റെ കല്ലിയാണപിറ്റേന്ന് ചമ്മിയഒരോറ്മയാണിത് അന്ന് എന്റെ വിവാഹപിറേറദിവസം രാവിലെ ഓരോരുത്തരും ഓരോരോ ജോലിയിലാണ് എന്നെ അവര് ഒരു ജോലിയും ചെയ്യാ ന് സമ്മതിക്കുന്നില്ല അതിനല് ഞാന് ഒരിത്തിരി നാണത്തോടെ അടുക്കളയുടെ ഒരു മൂലയില് എന്തു ചെയ്യണം എങിനെ ചെയ്യണം എന്നറിയാതെ എന്റെ വീട്ടുകാരെകുറിച്ചുളള ആലോചനയിലായിരുന്നു അന്നേരം ഞങളുടെഉമ്മ(ഭറ്ത്താവിന്റെ ഉമ്മ)എന്നോട്പറഞു മോളെ--അവിടേയുളള ചിമ്മിനി പാത്തറം ഒന്ന് എടുത്ത് തരോ എന്ന് ചോദിച്ചു അടുക്കളയില്ന്ന് ഒന്നുനീട്ടിയ ഒരുചെറിയ റൂമുണ്ട് ഉമ്മ മുററത്തുനിന്ന് ആറൂമിലോട്ട് കൈ ചൂണ്ടിയാണ് ചോദിച്ചത് ഞാന് അവിടെ നോക്കിയപ്പോള് കല്ലിയാണത്തിന് ബിരിയാണി വെച്ച വലിയൊരു എടുത്താപൊങാത്ത ചെമ്ബിന്റെ കലവും ഒരു മണ്ണെണ്ണയുടേ ടിന്നും പിന്നെഅല്ലറചില്ലറ സാധനങളുംഉണ്ട് ശരിക്കുംപറഞാ ചിമ്മിനി പാത്തറം എന്താണന്ന് എനിക്ക് മനസ്സിലായിട്ടില്ല ഞാന് മണ്ണെണ്ണയുടെ ടിന്നിലോട്ട് ഒന്നുനോക്കി അന്നേരം ഞാന് എന്റെമനസ്സില്കരുതി ഏയ്--ഇതായിരിക്കില്ല കാരണം ഉമ്മ എന്നോട് ചോദിച്ചത് ചിമ്മിനിപാത്തറംആണല്ലോ ഇത്ടിന്നല്ലേ അല്ലന്കില് കന്നാസ്എന്നുപറയൂലേ എന്നാണ്ഞാനാലോചിച്ചത് പിന്നെഎന്റെ കണ്ണുപോയത് ബിരിയാണിക്കലത്തിലേക്കാണ് ഞാന്േവറൊന്നും ആലോചിച്ചില്ല ആ കലം തെന്നേആയിരിക്കും എന്നുറപ്പിച്ചു അതുകൊണ്ട് കൊടുക്കാന് വേണ്ടി ഞാന് കലം പൊക്കാന് തുടങി ചെമ്ബിന്റെതായതുകൊണ്ട് നല്ല ഭാരം എടുത്താല്പൊങാത്ത കലവും കൊണ്ട് ഞാന് പിച്ച--പിച്ച നടന്നു അടക്കളയിലെത്തിയപ്പോള് എന്റെ കലം പിടിച്ചുളള വരവു കണ്ട് എല്ലാവരും വലിയ ചിരിയോട്ചിരി എനിക്ക് സംഭവം ഒന്നും പിടുത്തം കിട്ടിയില്ല ഇവരുടെ ചിരി കണ്ടപ്പോ എനിക്ക് വിശമം ആണ്തോന്നിയത് അന്നേരം അവര് എനിക്കുപറഞുമനസിലാക്കി തന്നു ചിമ്മിനിഎന്നുപറഞാല് മണ്ണെണ്ണയാണ് മണ്ണെണ്ണട്ടിന്നാണ് ഉമ്മ എന്നോട് എടുക്കാന്പറഞതെന്ന് അപ്പോഴാണ് ഞാന് ശരിക്കും ചമ്മിയത് --ഈസംഭവം എപ്പോഴുംഎന്റെമനസ്സില് തെളിഞുവരാറുണ്ട് അന്നേരം എനിക്ക്അന്നവര്ചിരിച്ചപോലെ എനിക്കും ചിരിയാണ് വരിക---

2009-10-30T21:18:00.001+03:00